DILI, 05 Fevereiru 2026 (TATOLI)-Governu Portugál liuhusi Embaixadór Portugál ba Timor-Leste, Duarte Bué Alves, agradese ba inisiativa husi Timor-Leste ne’ebé apoiu ona osan millaun $5 ba rekonstrusaun no konsegimentu tempestade ne’ebé akontese iha iha Rio de Janeiro no sidade Iria.
Notísia Relevante: KM aprova doasaun millaun $5 ba Portugál
Embaixadór Portugál iha Timor-Leste, Duarte Bué Alves, hateten mensajen dahuluk ne’ebé nia hakarak hato’o ba Primeiru-Ministru, Kay Rala Xanana Gusmão, mak agradésimentu lori Governu Portugál nia naran tanba liuhusi reuniaun Konsellu Ministrus kuarta ne’e deside halo aprovasaun apoiu millaun $5 ba Portugál.
“Nune’e, iha kalan ne’e kedas, ha’u informa ba Lisboa atu komunika desizaun ne’e no ho naran Governu portugés nian. Tanba ne’e, agradesementu wa’in husi Governu Portugés ba povu Timor-Leste nian ne’ebé sempre iha solidariedade ba malu hanesan maun no alin,” Embaixadór Portugál ne’e informa ba jornalista sira hafoin hala’o enkontru ho Primeiru-Ministru. Kay Rala Xanana Gusmão, iha Palásiu Governu, ohin.
Nia relata, tanba akontesimentu dezastre ne’e konsege hamate ema barak, destruisaun boot ba uma, fábrika sira, edifísiu servisu sira, entaun sira presiza osan barak hodi bele rekonstrui fila-fali.
“Asaun ida ne’e hanesan sentidu gratidaun fraterninade ne’ebé aprofunda tebes entre nasaun rua ne’e rasik. Maske iha tempu uluk Portugál invade ona nasaun Timor-Leste maibé buat ne’ebé uluk husik liu ona agora kontinua servisu hamutuk ba futuru mai,” nia dehan.
Jornalista : Alexandra da Costa
Editór : Cancio Ximenes
