DILI, 05 Fevereiru 2026 (TATOLI)—Governu no Igreja konkorda kria komisaun konjunta hodi tau matan ba prosesu transladasaun bispu Timor na’in-tolu ne’ebé mate no hakoi iha Lisboa-Portugál, hanesan bispu dahuluk Dom Jaime Garcia Goulart, bispu daruak Dom José Joaquim Ribeiro no bispu Dom Martinho Lopes nia restu mortál mai Timor-Leste.
Notísia Relevante: 2026, Igreja-Estadu halo transladasaun restu mortál Dom Martinho husi Portugál mai TL
Igreja liuhusi Konferénsia Episkopál Timorense (CET, sigla portugés) ne’ebé kompostu husi Bispu Dili, Dom Virgílio do Carmo da Silva, Bispu Maliana, Dom Norberto do Amaral no Bispu Baukau, Dom Leandro Maria Alves, kinta ne’e, konvoka enkontru ho Primeiru-Ministru, Kay Rala Xanana Gusmão, hodi atualiza preparasaun Igreja no Governu ba prosesu transladasaun restu mortál amu Bispu na’in-tolu nian ne’ebé sei translada iha Setembru 2026.
Prezidente Konferénsia Episkopál Timorense, Dom Virgílio Kardeál do Carmo da Silva, hateten banhira ko’alia kona-ba transladasaun ida-ne’e inisiativa ida ne’ebé fó sai tiha ona, antes ne’e mós sira ko’alia ona ho Xefe Estadu, José Ramos-Horta ne’ebé hanoin atu halo transladasaun restu mortál Bispu Martinho Lopes nian no Bispu Timor na’in-rua seluk ne’ebé hakoi mós iha Lisboa-Portugál.
“Bispu sira-ne’ebé hakoi hotu iha Lisboa Portugál ami planeia atu lori fila-fali sira-nia restu mortál mai iha Timor atu haloot iha ita-nia igreja katedrál, ida ne’e mak ohin ami partilla ho Primeiru-Ministru ba planu ida ne’e, hodi buka oinsá hadi’a di’ak liután planu ida ba eventu ida sei mai,” Prezidente CET ne’e hateten ba jornalista sira iha Palásiu Governu, ohin.
Ba oin, bispu ne’e dehan, sei forma komisaun konjunta ida atu organiza atividade ida-ne’e, nune’e sira planeia atu translada iha Setembru tinan ida-ne’e, no tuir planu restu mortál husi bispu na’in-tolu (3) iha Lisboa sei haloot mós ho Bispu Dom Alberto Ricadrdo Silva nian, tanba to’o agora sei hakoi iha hela Maloa, Dili.
“Durante enkontru, Primeiru-Ministru mós hatudu vontade di’ak no konvida kedas Ministériu relevante sira-ne’ebé bele kolabora oinsá ajuda ba preparativu ba iha transaladasaun ne’e. Komisaun sira iha hotu ona, hein de’it enkontru hamutuk ba preparasaun nian,” nia dehan.
Iha biban ne’e, ekipa CET aprezenta Prezidente atuál Konferénsia Episkopál Timorense, Dom Virgílio Kardeál do Carmo da Silva troka fali Prezidente sesante Dom Norberto do Amarál, ba mandatu tinan lima hahú husi 2026-2030, ba Xefe Governu.
Jornalista : Alexandra da Costa
Editór : Cancio Ximenes
