DILI, 08 Fevereiru (TATOLI)–Federasaun Futeból Timor-Leste (FFTL) hamutuk ho Delegasaun Federasaun Internasionál Futeból Asosiasaun (FIFA) no Asian Football Federation (AFF) konvoka enkontru ho Prezidente Repúblika, José Ramos Horta, hodi ko’alia kona-ba apoiu infraestrutura no aprezenta Prezidente Eleitu FFTL nian.
Prezidente Federasaun Futeból Timor-Leste, Nilton Gusmão hateten ohin vizita kortézia ida-ne’ebé halo ho Prezidente Repúblika atu mai kumprimenta no mós hato’o programa balun ne’ebé FIFA no FFTL hanoin atu tulun federasaun futeból hodi dezenvolve infraestrutura futeból iha rai-laran.
Nia haktuir Prezidente Repúblika fó nia apoiu totál atubele konkretiza lalais ideia sira ne’ebé FIFA hanoin atu tulun infraestrutura futeból iha Timor-Leste.
Notísia relevante: Nilton Gusmão kompromete sei eleva prestasaun futeból Timor-Leste
“FIFA disponibiliza ona sira-nia fundu balun atubele apoiu no servisu hamutuk ho Governu hodi harii infraestrutura ida-ne’ebé tuir padraun FIFA nian hodi fó oportunidade ba atividade desportu,” Prezidente Eleitu FFTL relata ba jornalista sira iha Palásiu Prezidente, Bairru-Pité, Domingu ne’e.
Aleinde ne’e, Nilton dehan, sira mós atualiza ba Prezidente Repúblika kona-ba Prezidente Eleitu FFTL nian no lala’ok kongresu FFTL ne’ebé la’o ho di’ak.
Iha fatin hanesan, Delegadu Konsellu FIFA, Tan Sri Dato’ Haji Hamidin Bin Mohd Amin, hateten sira-nia prezensa iha-ne’e hodi partisipa kongresu FFTL no kongratula Nilton Gusmão ne’ebé nafatin lidera FFTL ba mandatu tinan haat.
“Hafoin ne’e, ami mós mai hasoru Prezidente Repúblika, José Ramos Horta no ami kontente tebes tanba hanesan FIFA no AFF, ami sempre suporta FFTL atu harii estádiu foun. Ne’e ami-nia objetivu dahuluk ba kooperasaun nian. Ami mós agradese tebes ba Prezidente Repúblika ne’ebé suporta tebes futeból iha Timor-Leste,” nia relata.
Nia informa katak Prezidente FIFA, Gianni Infantino sei mai vizita Timor-Leste iha tinan ida-ne’e, loron tentativa iha fulan- Agostu nia laran.
Jornalista: Alexandra da Costa
Editór: Xisto Freitas da Piedade
