DILI, 08 Fevereiru 2026 (TATOLI)–Prezidente Eleitu Federasaun Futeból Timor-Leste (FFTL), Nilton Telmo Gusmão dos Santos kompromete sei eleva prestasaun futeból durante mandatu períodu 2026-2030.
Nilton konvida entidade hotu liuliu asosiasaun membru FFTL, Governu no klube hotu atu serbisu hamutuk hodi transforma futeból sai urgullu nasionál tanba papél futeból iha dimensaun koezaun sosiál, inkluzaun, promosaun juventude no afirmasaun identidade nasionál iha-ne’ebé kada komunidade sei fó sustentabilidade desportu murak ba futuru nasaun.
“Nu’udár prezidente eleitu ba mandatu tinan-haat, hamutuk ho komité ezekutivu eleitu hotu kompromete sei buka no hametin aprosimasaun ho Governu Timor-Leste, kooperasaun estratéjika ho FIFA, AFC no AFF hodi realiza mehi boot povu nian atu iha kampu no estádiu rasik tuir padraun FIFA hodi permite Timor-Leste sai iha jogu nivel internasionál,” Nilton Gusmão hateten iha Palm Springs Hotel, Markoni, Domingu (08/02/2026).
Notísia relevante: Nilton Gusmão re-eleitu ba Prezidente FFTL períodu 2026-2030
Nilton Gusmão relata FFTL sei hala’o pograma grass road ne’ebé sai prioridade estratéjika FFTL ba períodu tinan-haat mai iha-ne’ebé hala’o atividade hanesan futeból sei hahú husi eskola, suku, klube lokál no kampu ki’ik sira, kontinua promove kompetisaun sub-15 no 17 feto no mane, hametin kompetisaun feminina.
Aleinde ne’e, kontinua hala’o programa formasaun ba treinadór no árbitu inklui programa inkluziva sira hodi hametin koezaun hodi garante futeból sai oportunidade ba juventude iha rai-laran.
Seluk, kontinua implementa programa sira hanesan reabilitasaun Estádiu Munisipál Dili tuir padraun FIFA iha-ne’ebé antes ne’e FFTL no Governu selebrasaun ona kontratu konsensaun uzu no planu konstrusaun estádiu foun no kampo futsál Indoor iha futuru ne’ebé sei hein atribuisaun rai husi Ministériu Justisa (MJ).
Nune’e mós, sei implementa programa kooperasaun ho AFC kona-ba reabilitasaun kampu iha munisípiu Likisá, planu konstrusaun auditóriu foun iha edifísiu FFTL, Bairros dos Grilos, konstrusaun kampu futsál iha Munisípiu Lautein, Vikeke no Ainaru ne’ebé sei hahú konstrusaun iha tinan-ne’e.
FFTL mós kontinua implementa programa sosiál husi Asian Football Confederation (AFC) hodi apoia distribui bola iha territóriu no sei aumenta konstrusaun kampu futsál liuhusi apoia AFC inklui sei transforma atividade desportu ba Artificial Intelligence (AI) ne’ebé finansia husi AFF.
Eis Prezidente Liga Futeból Amadora Timor-Leste (LFA) ne’e aprezenta mós katak durante kompleta mandatu tinan-ida iha FFTL hala’o serbisu sira hanesan implementa konstrusaun mini kampu futeból rua no kampu boot ida kompleta ho fasilidade iluminasaun iha Kampu Demokrasia Dili.
Aleinde ne’e, harii loja ofisiál FFTL hodi komersializa ekipamentu selesaun nasionál hodi hakbesik jogadór ho adeptu sira no organiza kompetisaun Tasa Liga FFTL 2025 nu’udar pre-époka ba kompetisaun Liga Futeból Timor-Leste (LFTL).
“Rezultadu sira-ne’e hatudu ita iha progresu lubuk ida maibé hatudu mós katak ita-nia responsabilidade aas liután hodi halo barak no di’akliu iha tinan-haat mai ne’e,” Nilton Gusmão akresenta.
Jornalista: Natalino Belo
Editór: Xisto Freitas da Piedade
