DILI, 08 Fevereiru 2026 (TATOLI)–Nilton Telmo Gusmão dos Santos eleitu hikas ba Prezidente Ezekutivu Federasaun Futeból Timor-Leste (FFTL) hafoin membru asosiasaun sira fó votu aklamasaun liuhusi kongresu ordináriu FFTL ba da-XIII iha Palm Springs Hotel, Domingu (08/02/2026).
Kongresu FFTL ba da-XIII ne’e prenxe rekizitu tuir estatutu numéru 29 artigu 1 katak realizasaun kongresu FFTL hala’o bainhira marka prezensa membru asosiasaun liu korum pursentu 50 iha-ne’ebé hamutuk delegadu 21 hanesan membru asosiasaun 19 kompostu asosiasaun munisipál 14 no asosiasaun profisiónal lima inklui klube rua kompostu klube vensedór primeira divizaun Karketu Dili FC no Aitana FC nu’udár vensedór segunda divizaun.
Iha kongresu ne’e, prosesu eleisaun ba kandidatura pakote úniku kompostu husi Nilton Gusmão nu’udár Prezidente Ezekutivu FFTL, Tenente Jenerál Falur Rate Laek sai Vise Prezidente no membru komité ezekutivu sira mak hanesan José Luís de Oliveira, Komisáriu Polísia Henrique da Costa, Domingos dos Santos Caeiro, Engracia Fernandes no Faustinho Godinho dos Santos.
Tuir estatutu FFTL numéru 31 kona-ba eleisaun hateten prosesu votasaun bele hala’o liuhusi aklamasaun nune’e maioria asosiasaun sira fó votu ba kada membru sira hahú husi Prezidente, Vise Prezidenti inklui membru ezekutivu sira hodi lidera FFTL ba períodu 2026 to’o 2030.
Hafoin eleitu, Prezidente FFTL, Nilton Gusmão liuhusi deskursu esplika, kongresu ohin hatudu ho klaru husi komité eleitorál ne’ebé ho profisiónalizmu, integridade no responsabilidade aas hodi garante prosesu eleitorál ho transparénsia, kredivel tuir estatutu FFTL.
“Kongresu ohin loron hatudu klaru no seriedade katak FFTL iha maturidade institusionál, koezaun forte entre asosiasaun membru sira no iha fundasaun mentin atu kontinua la’o iha-ne’ebé ita hahú ona,” Nilton Gusmão hateten.
Nilton hato’o agradesimentu ba autór futeból liuliu asosiasaun membru FFTL hotu ne’ebé kontribui ho laran tomak hodi asegura serbisu hotu hodi eleva dezenvolvimentu futeból iha Timor-Leste to’o ohin realiza kongresu ordináriu ba da-XIII.
Nia konsidera desizaun ne’ebé foti liuhusi kongresu ordináriu hodi hametin lejitimidade demokrátika FFTL no konsolida baze ne’ebé estavel ba futuru futeból Timor-Leste tanba mezmu kandidatu pakote úniku ne’e hatudu símbulu unidade no konfiansa koletiva tuir dalan estratéjia hodi la’o hamutuk bá-oin.
Iha fatin hanesan, Delegadu Membru Konsellu FIFA, Tan Sri Dato’ Haji Hamidin Bin Mohd Ami, hato’o parabéns ba estrutura membru ezekutivu eleitu lideradu Prezidente FFTL, Nilton Gusmão ne’ebé konsideradu iha espíritu desportiva hodi lori futeból Timor-Leste kompete iha nivel internasionál.
“Ha’u iha kompromisu apoia totál ba Prezidente FFTL atu dezenvolve futeból iha Timor-Leste. Ha’u kompromete Timor-Leste nia lian sei rona iha FIFA no sei sai ba asaun,” Tan Sri Dato’ Haji Hamidin Bin Mohd Ami hateten.
Delegadu FIFA ne’e hato’o mensajen ba asosiasaun membru no ativista futeból hotu atu koopera ho membru ezekutivu períodu 2026-2030 liuliu fó konfiansa ba Nilton Gusmão ne’ebé konsideradu nu’udár komandu uniku tanba estabilidade mak sai fatór determinasaun ba progresu dezenvolvimentu futeból liuliu iha ekipa nasionál ne’ebé kompetitivu iha nivel internasionál.
Entretantu, kongresu ordináriu referida hala’o ho prezensa Ministru Juventude, Desportu, Arte no Kultura (MJDAK), Nelyo Isaac Sarmento, Ministru Justisa, Sergio Ornai, Delegadu Membru Konsellu FIFA, Tan Sri Dato’ Haji Hamidin Bin Mohd Ami, Diretór FIFA ba Azia no Oceania, Sanjeevan Balasingam, Prezidente AFF, Majór Jenerál Kiev Sameth, Sekretáriu Jerál AFF, Winston Lee no reprezentante Konfederasaun Futeból Aziátiku, Zuraina.
Jornalista: Natalino Belo
Editór: Xisto Freitas da Piedade
