DILI, 16 Dezembru 2025 (TATOLI)—Konferénsia Episkopál Timor (CET, sigla potugés) liuhusi Sua Eminénsia Dom Virgilio Kardeal do Carmo da Silva, SDB, hasoru malu ho Prezidente Repúblika José Ramos-Horta hodi koordena kona-ba Igreja ho Estadu sei planeia halo transladasaun ba restu mortál Dom Martinho Lopes husi Portugál mai Timor-Leste iha 2026.
“Ohin, Konferénsia Episkopál Timor hasoru malu ho Prezidente Repúblika ko’alia kona-ba oinsá halo transladasaun ba Dom Martinho Lopes nia restu mortál husi Lisboa Portugál mai Timor-Leste. Ita sei realiza iha tinan 2026, tarde liu iha fulan-Outubru hanesan ne’e,” Dom Virgilio Kardeál hateten ba jornalista sira hafoin aemata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Durante enkontru, CET relata mós ba Xefe Estadu bainhira halo transladasaun ba restu mortál Dom Martinho Lopes la’ós bispu ne’e mesak de’it, maibé ho mós bispu timoroan sira-ne’ebé antes ne’e hakoi hela iha Portugál nia restu mortál halo hotu transladasaun.
“Ami mós fó hanoin ba Prezidente Repúblika halo transladasaun karik labele Dom Martinho nian mesak de’it, tenke halo transladasaun ba Bispu timoroan sira ne’ebé hakoi hela iha Portugál hanesan ita-nia Bispu primeiru Don Jaime Garcia Goulart no Bispo Joaquim Ribeiro. Ami hato’o ida-ne’e ba Prezidente kontente no ida-ne’e sai mós hanesan momentu di’ak ida atu haree hamutuk,” Dom Virgílio hateten.
Nia dehan, daudaun ne’e Igreja ho Estadu haree hela oinsá atu halo preparasaun sira hodi halo transladasaun ho di’ak no ema hotu bele asiste nia prosesu sira husi Portugál mai to’o Timor-Leste.
“Entaun, Prezidente sei fó apoiu tomak kona-ba koordenasaun iha Lisboa ne’ebá no sei servisu hamutuk ho Konferensi Episkopal Timor hodi realiza eventu ne’e,” nia dehan.
Biografia
Dom Martinho da Costa Lopes moris iha Manatutu iha 11 Novembru 1918 no mate iha 27 Fevereiru 1991. Dom Martinho Lopes hanesan bispu iha Timor-Timur (Timor-Leste) hahú husi tinan 1977 to’o 1983 no sai membru konslelu nasionál iha Portugál.
Dom Martinho Lopes eskola iha semináriu menór Nossa Senhora de Fátima Soinada-Manatutu husi tinan 1935 to’o 1938, hafoin tinan rua sai semináriu menór iha Makau-Xina no tinan neen (6) iha semináriu maiór iha Makau-Xina.
Dom Martinho Lopes fila-fali mai iha Timor-Timur (Timor-Leste) iha Setembru 1946. Iha tempu ne’aba sai profesór hodi hanorin iha Colégio de S. Francisco Xavier dan Colégio-Liceu Dr. Francisco Machado. Nia simu ordenasaun saserdotál ka na’i-lulik iha 18 Abríl 1948 no hala’o servisu pastorál iha Bobonaru.
Iha tinan 1975 sai Vigariu iha Dioseze Dili, asistente prinsipál ba Bispu José Joaquim Ribeiro. Hafoin mosu invazaub iha 07 Dezembru 1975, tanba konflitu polítika, Bispu José Joaquim Ribeiro husu pedidu ba Santa Sé reforma no Papa Paulo VI aseita pedidu ne’e iha 22 Oktober 1977. No, iha biban ne’eba, Papa Paulo VI hili Nai-Lulik timoroan, Pe. Martinho da Costa Lopes, tinan 58, sai Adminstradór Apostoliku iha Dioseze Dili.
Jornalista : Hortencio Sanchez
Editór : Cancio Ximenes
