DILI, 05 Janeiru 2026 (TATOLI)—Klube Futeból ne’ebé akumula iha Grupu C no D seidauk serteja hakat ba meiu finál kompetisaun Tasa Liga Federasaun Futeból Timor-Leste (FFTL) 2025.
Grupu C akumula ekipa haat kompostu husi Portu Taibessi ne’ebé lidera tabela klasifikasaun ho pontu haat (4), Coração FC pontu haat (4), Lica-Lica Lemorai pontu tolu (3) no Fitun Estudante Lorosa’e (FIEL) pontu zero (0).
Enkuantu, iha Grupu D kompostu ekipa tolu ne’ebé lideradu husi Karketu Dili FC ho pontu tolu (3), As Marca pontu tolu (3) no Santa Cruz FC ho pontu zero (0).
Husi grupu B ekipa ne’ebé serteja ona eliminadu husi kompetisaun Tasa Liga FFTL mak FIEL ne’ebé derrota daruak mezmu sei kontra Karketu Dili Football iha jogu ikus, enkuantu Santa Cruz FC reprezenta Grupu D elimidadu hafoin derrota iha jogu rua iha faze kualifikasaun.
Aleinde ne’e, ekipa tolu Grupu C sei iha oportunidade hakat bá meiu finál hanesan Portu Taibessi bainhira manán kontra FIEL inklui ekipa rua seluk hanesan Coração no Lica-Lica Lemorai buka manán bainhira kontra malu ne’ebé determina semana-ne’e iha Estádiu Munisipál Dili.
Husi Grupu D, Karketu Dili FC iha oportunidade boot hakat bá meiu finál bainhira mínimu impata ho Santa Cruz iha jogu ikus ne’ebé sei realiza iha Estádiu Munisipál Dili, Domingu (08/02/2026).
Entretantu, grupu rua seluk serteja ona hanesan ekipa Emanuel FC reprezenta Grupu A no Assalam FC husi Grupu B hakat bá meiu finál ne’ebé tuir regulamentu sei hala’o ho sistema home and away ne’ebé tuir kalendáriu sei realiza 15-22 Fevereiru 2026.
Jornalista: Natalino Belo
Editór: Xisto Freitas da Piedade
