OEKUSI, 06 Fevereiru 2026 (TATOLI) – Diretora Diresaun Rejionál Saúde Rejiaun Administrativa Espesiál Oekusi Ambeno (RAEOA), Merita Marques Lafo, sesta ohin, fó-sai katak, hahú husi fulan-Janeiru to’o Fevereiru 2026 ne’e, Ospitál Referál Oekusi (HRO), rejista kazu dengue hamutuk pasiente na’in-16 maioria iha suku Costa no suku Cunha sub-rejiaun Pante Makasar.
“Ita rejista kazu 16 tanba pozitivu ho dengue. Husi kazu 16 ne’e, pasiente sira maioria mai husi Dili, sira ba Dili semana rua to’o tolu, mai fali mak hetan moras dengue ne’e, ne’ebé husi 16 ne’e maioria rejista iha suku Costa no na’in-tolu iha suku Cunha. Pasiente hirak-ne’e, agora daudaun sei ativa hela halo tratamentu iha fasilidade saúde,” nia hateten ba jornalista sira iha Oekusi, ohin.
Notísia relevante:Prevene dengue, MS apela ba komunidade hamoos ida-idak nia hela fatin
Diretora ne’e orgullu, tanba fasilidade saúde sira iha sub-rejiaun Oésilo, Pássabe no Nítibe, la rejitsa, tanba ne’e nia espera katak komunidade sira, presiza atensaun ho medida preventiva, tenki hamoos ambiénte iha uma oin, evita bee nalihun iha uma oin.
“Medida ne’ebé ita aplika husi saúde maka fumigasaun no tratamentu avatizasaun ba fatin ne’ebé konsidera sai afetadu. Agora ita halo ona fumigasaun ba área sira-ne’ebé risku hanesan iha suku Costa iha bairru Oétulu, Palaban, Numbei no Sikluli, maibé mi husu ba komunidade sira, atu koopera tanba dalaruma, balu lakoi koopera simu pesoál saúde sira halo fumigasaun iha bairru no rezidénsia uma hela fatin,” nia hateten.
Aderita Elsa Maria, husi bairru Masin suku Costa, nu’udar inan husi pasiente ida husi moras dengue haktuir, kronolojia mosu dengue, hahú husi isin manas sa’e maka’as, hodi rezulta nia oan lakon vontade hodi konsumu ai-han. Nune’e nia deside hodi hakbesik ba fasilidade atu hetan tratamentu ho seguru.
“Moras primeiru, ha’u-nia oan iha eskola hela, to’o ona tuku rua, mak ha’u buka nia iha eskola hodi lori nia mai iha uma, konsege fó ai-moruk, maibé la konsege di’ak, entaun aban fali iha loron kinta semana kotuk ne’e, ha’u mai ospitál hasai raan, ne’ebé rezultadu husi raan ne’e hatudu pozitivu dengue, entaun ami tenke baixa iha ospitál. Tanba kazu ne’e mosu isin manas sa’e maka’as no la me’ar, ne’e mak ami halai mai ospitál hodi hetan tratamentu ”.
Jornalista: Abílio Elo Nini
Editór: Rafael Ximenes de A. Belo
