DILI, 03 Fevereiru 2026 (TATOLI)—Ministra Saúde, Elia dos Reis Amaral, apela ba komunidade atu hamoos ida-idak nia hela fatin hodi prevene moras dengue, tanba bainhira komunidade soe lixu arbiru mak sei hamosu susu barak no sei fó impaktu ba sáude públiku.
Notísia Relevante: Janeiru-02 Fevereiru: HNGV rejista kazu dengue 383, na’in-lima mate
“Ita halo komparasaun katak tinan kotuk 2022 liu ba kazu fatalidade ne’e sa’e 30 resin, maibé iha tinan 2023, 2024, 2025, antes udan monu rai ita halo ona fomigasaun ba área sira-ne’ebé mak iha risku nia laran. Entaun, ita hatene katak prevensaun ne’e mai husi ita-nia konxiensia rasik katak susuk mai husi foer ka ambiente ne’ebé mak la saudavel. Ezemplu, ita han ka hemu bee akua ida soe arbiru ne’e mós kria ona ambiente ne’ebé mak ladi´ak ba ita-nia oan sira,” Elia dos Reis Amaral informa ba jornalista siira, iiha kampu Bekora, ohin.
Nia hatutan, durante ne’e ekipa sira tama sai uma halo nafatin sensibilizasaun ba komunidade kona-ba oinsá halo prevensaun ba kazu dengue.
“Husi tinan 2025 husi fulan dezembru mai to’o agora kazu dengue nasional hamutuk 1.700 resin no haat mak lakon vida no agora ita halo nafatin prevensaun. Tanba ne’e, ita halo ona ajendamentu atu halo fumigasaun ba área Dom Aleixo nian. Ita hatene iha ne’eba populasaun barak agora fila-fali ba konxiénsiia ema-nian katak banhira soe foer arbiru impaktu ba saúde publika ema-nian,” nia esplika.
Nia relata, ai-moruk fomigasaun sufeinte hela, nune’e iha fulan-Fevereru nian laran ekipa fomigasaun sei konsentra de’it iha Postu adminsitativu Dom Aleixo tanba iha ne’eba mak área risku ba kazu dengue.
Notísia Relevante: MS rejista kazu dengue 1.002 iha Janeiru no intensifika medida prevensaun
Jornalista : Felicidade Ximene
Editór : Cancio Ximenes
