DILI, 06 Fevereiru 2026 (TATOLI)—Ekipa husi Konsellu Veteranu asegura ona sidadaun ho inisiál MB husi Kupang, Indonézia ne’ebé suspeitadu falsifika dokumentu hodi sai benefisiáriu ba pensaun veteranu iha Kovalima.
“Diresaun Servisu Investigasaun Kriminál (DSIK) iha kooperasaun di’ak ho parte Ministériu Asuntu Veteranu, ne’ebé ami fahe informasaun balun konsege ita detekta tan sidadaun Indonézia ida tan mai iha Timor-Leste hodi halo falsifikasaun dokumentu atu simu osan veteranus iha Kovalima,” Portavós Komandu Jerál Polísia Nasionál Timor-Leste (PNTL), Superintendente Polísia João Belo Dos Reis, hato’o ba jornalista sira, iha Komandu Jerál PNTL, Kaikoli, Sesta ne’e.
Notísia relevante : Sidadaun Indonézia ne’ebé falsifika dokumentu hodi simu pensaun veteranu, asegurada iha DSIK
Nia haktuir, PNTL tinan kotuk deteta sidadaun feto ida husi Manatutu no agora Polísia hamutuk parte Ministériu Asuntu Veteranu deteta tan sidadaun feto ida husi parte Suai, ne’ebé mak hela iha Kupang, tenta atu falsifika dokumentu ne’ebé mak fasilita husi ema balun.
“Nia (sidadaun Indonézia) ne’e seidauk konsege simu no agora Polísia halo prosesu identifikasaun no prosesu agora la’o hela. Dokumentu ne’ebé mak iha mak dokumentu Billete de Identidade, pasaporte no sertidaun RDTL,” nia akresenta.
Servisu Investigasaun Kriminál halo ona investigasaun ba sidadaun MB hodi buka tuir nafatin autór sira ne’ebe fasilita dokumentu.
“Prosesu ne’e sei la’o hela buat sira ne’ebé mak hola parte iha segredu justisa, ha’u labele publika ba maluk sira agora,” nia katak.
Prosesu idenfikasaun la’o hela no Polísia sei aprezenta ba Ministériu Públiku.
“Sidadaun ne’e agora iha hela ninian família, mas nia dokumentu sira ita asegura, prosesu ba oin no naran inisiál MB,” nia relata.
Komandante Joao hateten, DSIK aprezenta kazu falsifikasaun dokumentu veteranu ne’e ba Ministériu Públiku.
“Ami agora hein karta mandadu. Nune’e bele halo prosesu julgamentu Primeiru Interrogatóriu,” Portavós katak.
Jornalista : Natalino Costa
Editora : Julia Chatarina
