DILI, 06 Fevereiru 2026 (TATOLI)–Ekipa Portu Taibessi FC garante sei manán Fitun Estudante Lorosa’e (FIEL) iha jogu ikus Grupu C hodi hakat bá meiu finál kompetisaun Tasa Liga Federasaun Futeból Timor-Leste (FFTL) 2025.
Treinadór Prinsipál Portu Taibessi, Luís Simões esplika atu atinje objetivu referidu nia parte fó konfiansa ba jogadór liña dahuluk iha kampu liuhusi treinu másimu bainhira kontra FIEL FC iha Estádiu Munisipál Dili, Sesta (06/02/2026).
Notísia relevante: Portu Taibessi garante hakat bá meiu finál
“Hakarak avansa bá-oin tenke garante manán,” Treinadór Portu Taibessi hateten iha Estádiu Munisipál Dili, Sesta ne’e.
Iha fatin hanesan, Kapitaun Ekipa Portu Taibessi, Cláudio Araújo kompromete sei lidera jogadór sira iha kampu tuir oriintasaun treinadór bainhira kontra FIEL bazeia ba preparasaun hotu liuhusi treinu ne’ebé Portu Taibessi hala’o ona.
“Ekipa hotu-hotu iha kapitaun ne’ebé hakarak lori ekipa to’o faze meiu finál,” Claudio argumenta.
Entretantu, Portu Taibessi lidera tabela klasifikasaun Grupu C ho pontu haat (4) no sei hakat bá meiu finál bainhira manán FIEL FC ne’ebé eliminadu ona husi Tasa Liga FFTL hafoin derrota ona iha jogu rua ho pontu 0.
Enkuantu, Grupu C akumula mós klube rua seluk hanesan Coração FC ne’ebé rekolla pontu haat (4) no Lica-Lica Lemorai ho pontu tolu (3) iha-ne’ebé ekipa rua sei kontra malu iha kampu Federasaun Futeból Timor-Leste (FFTL), Bairros dos Grilos, Sesta (06/02/2026).
Jornalista: Natalino Belo
Editór: Xisto Freitas da Piedade
