DILI, 30 Janeiru 2026 (TATOLI)–Ekipa Futeból Portu Taibessi garante sei gaña pontu tolu husi Lica-Lica Lemorai no fiar an sei hakat bá meiu finál Tasa Liga Federasaun Futeból Timor-Leste (FFTL) 2025.
Treinadór Taibessi FC, Hangki Nogueira konsidera Lica-Lica Lemorai nu’udár ekipa forte no jogu referidu hanesan jogu ne’ebé determina destinu Portu Taibessi nune’e sei hadau pontu tolu iha jogu ne’e ne’ebé tuir órariu sei realiza iha Estádiu Munisipál Dili, Domingu (01/02/2026).
“Jogu daruak ida-ne’e ami hakarak gaña pontu tolu no hanesan treinadór ha’u hakarak lori Portu Taibessi bá meiu finál,” Treinadór Portu Taibesi hateten iha Estádiu Munisipál Dili, Sesta ne’e.
Notísia relevante: Portu Taibessi impata ho Coração, FIEL derrota 0-3 ho Lica-Lica Lemorai
Nogueira relata hafoin iha jogu dahuluk impata 1-1 ho Coração FC, maibé Portu Taibessi halo kedas evaluasaun no kontinua treinu hodi prepara di’ak liután nune’e bainhira kontra Lica-Lica Lemorai no Fitun Estudante Lorosa’e (FIEL) bele gaña pontu hodi hakat bá meiu finál.
Aleinde ne’e, Kapitaun Ekipa Portu Taibessi, Cláudio F. S. Araújo hateten nu’udar jogadór sei halo tuir oreintasaun treinadór ne’ebé durante ne’e fó-sai liuhusi treinu no sei aplika iha jogu bainhira kontra Lica-Lica Lemorai.
“Ami iha esperansa forte hetan pontu tolu,” Cláudio Araújo argumenta.
Tuir regulamentu kompetisaun Tasa Liga FFTL, faze dahuluk ekipa sira sei hala’o kualifikasaun grupu iha-ne’ebé sei kontinua faze meiu finál ne’ebé kada grupu reprezenta ekipa ida antes deside bá finál ne’ebé partisipa husi klube futeból hamutuk 13.
Entretantu, iha Grupu C, provizoriamente Lica-Lica Lemorai lidera tabela klasifikasaun ho pontu tolu (3), Portu Taibessi pontu ida (1), Coração FC pontu ida (1) no FIEL iha tabela ikus ho pontu 0.
Jornalista: Natalino Belo
Editór: Xisto Freitas da Piedade
