BAUKAU, 06 Fevereiru 2026 (TATOLI)-Primeiru-Ministru, Kay Rala Xanana Gusmão, konsidera ferik no katuas sira mak erói ba libertasaun nasaun, tanba sira mantein hodi hasoru inímigu sira iha tempu funu.
Notísia Relevante: PM Xanana Gusmão lansa reabilitasaun estrada urbana Baukau
Xanana hatutan, iha ámbitu ukun rasik-an ne’e, ferik no katuas sira iha baze ne’e hein no husu ba Governu atu dezenvolve Timor-Leste liuhusi habelar dezenvolvimentu iha baze no hakbesik dezenvolvimentu ba povu.
“Ferik no katuas sira nia kontribuisaun iha tempu uluk ne’e barak tebes maibé sira la husu buat ida ba Governu. Ferik-katuas sira só husu de’it Governu mak dezenvolvimentu ba rai ida ne’e, entaun dezenvolvimentu sira ne’e mak hanesan estrada, ahi no bee-moos,” Xefe Governu ne’e hateten iha serimónia lansamentu ofisiál reabilitasaun Estrada urbana iha Baukau, ohin.
Tanba ne’e, Xefe Governu husu ema hotu atu tau matan ba katuas-ferik sira tanba sira mak sai erói ba rezisténsia no joven sira mak sai jerasaun foun, nune’e labele ona atu kria konflitu ba malu maibé oinsa hamutuk atu kontribui no dezenvolve rai ida-ne’e.
“Katuas-ferik sira hotu mak iha ne’e sira mak terus no liberta rai ida-ne’e ka laiha ema seluk, imi mak duni sai inímigu husi Timor, imi mak eróiu no imi mak kaer mehi husi be’iala sira,” Xanana hateten.
Jornalista : Alexandra da Costa
Editór : Cancio Ximenes
