DILI, 07 Fevereiru 2026 (TATOLI)—Ekipa Portu Taibessi Football Club (FC) hakat bá meiu finál hafoin iha jogu ikus kualifikasaun Grupu C Tasa Liga Federasaun Futeból Timor-Leste (FFTL) 2025 dere Fitun Estudante Lorosa’e (FIEL) ho skor 5-1 ne’ebé hala’o iha Estádiu Munisipál Dili, Sesta (06/02/2026).
Elementu Luís Simões ne’e susesu kumpri promesa hodi kontinua ba meiu finál bainhira kontra FIEL FC iha-ne’ebé golu lima referidu prodús hotu husi jogadór Jardiel Piedade.
Jogadór avansadu ho numéru kamizola 9 ne’e iha parte dahuluk enxe golu tolu (hattrick) iha minutu 8, 12 no 40 hodi rezulta tabela skor 3-0 iha parte dahuluk. Golu rua seluk prodús iha parte daruak iha minutu 58 no 84. Enkuantu, golu ida husi FIEL FC prodús husi jogadór Natalizio Sang iha minutu 73.
Notísia relevante: Portu Taibessi garante manán FIEL FC hodi hakat bá meiu finál
Ho rezultadu jogu entre ekipa rua, rezulta Portu Taibesi hetan tikete ba meiu finál bainhira rekolla pontu hitu (7) hafoin manán rua (2), impata ida (1), entretantu FIEL FC iha pozisaun ikus iha-ne’ebé derrota jogu tolu (3) iha kompetisaun Tasa Liga FFTL.
Aleinde ne’e, iha oras hanesan Lica-Lica Lemorai ne’ebé iha ambisaun atu hakat bá meiu finál ho esperansa Portu Taibessi derrota ho FIEL obrigadu tenke elimidadu mezmu manán kontra Coração iha jogu ikus ho skor 4-2 ne’ebé hala’o iha Kampu FFTL, Bairros dos Grilos, Sesta (06/02/2026).
Ekipa Lica-Lica susesu manán ho skor 4-2 iha-ne’ebé golu haat referidu prodús husi jogadór Mario de Deus iha minutu 22 no 60, Rivaldo Correia 29 no Jonas Conceição 69, enkuantu Coração FC ne’ebé iha oportunidade ba meiu finál lidera uluk golu rua (2) liuhusi jogadór Lexi Atok iha minutu 4 no Miguel Barbosa minutu 17.
Entretantu, rezultadu kualifikasaun Grupu C Portu Taibessi lidera ho pontu hitu (7) ne’ebé produtividade golu hitu (+7), Lica-Lica Lemorai iha pozisaun daruak (2) ho pontu neen (6), rezultadu manán rua (2), derrota rua (2), Coração FC iha pozisaun datoluk (3.o) ho pontu hitu (4) hafoin manán ida (1), impata ida (1) no FIEL FC pontu zero (0) hafoin derrota iha jogu tolu (3).
Jornalista: Natalino Belo
Editór: Xisto Freitas da Piedade
