DILI, 09 Fevereiru 2026 (TATOLI)—Aplikante ba vaga membru Polísia Nasionál Timor-Leste (PNTL) 2025 ne’ebé la submetidu ba prova médiku hahú hato’o reklamasaun ba Ministériu Interiór (MI).
“Reklamasaun hahú ohin hatama ona, maibé ida-ne’e ita rasik mak tenke hato’o. Tenke kandidatu rasik mak reklama nia an,” Portavós Komisaun Rekrutamentu membru PNTL foun 2025, Superintendente Polísia António da Luz, hato’o ba Jornalista sira liuhusi konfrénsia imprensa ne’ebé mak hala’o iha Sentru Formasaun Polísia, Komoro, Segunda ne’e.
Nia dehan, prosesu kuandu ema ruma la satisfáz maka iha dalan legál atu hato’o rekursu.
“Ema ruma maka sente ofendidu nia bele ba halo rekrusu, ne’ebé husu ba kandiatu sira ne’ebé la satisfáz ohin ami loke ona ba ita-boot sira hodi halo reklamasaun ba prosesu ida-ne’e, la’ós ema seluk maka halo reklamasaun, kuandu la satisfaz ita hato’o keixa tanba ita labele limite ema, tanba ita nasaun demokrátiku, sé de’it bele hato’o keixa, ema sira iha Sekretariadu bele halo justifikasaun,” nia akresenta.
Notísia relevante : Komisaun Rekrutamentu deside halo adiamentu teste médiku ba aplikante vaga PNTL
Portavós dehan, reklamasaun sira bele submete ba Gabinete MI ne’ebé estabelese ona Sekretariadu Komisaun Rekrutamentu.
Nia katak, aplikante sira tenke hato’o mós razaun halo reklamasaun tanba tuir Diploma Ministeriál númeru 17/2025 hateten katak buat hotu kona-ba rekursu ba rekrutamentu ne’e tenke submete ba MI. Tanba ne’e maka ekipa ne’ebé estabelese simu reklamasaun bele submete ba MI.
Diploma Ministeriál númeru 17/2025 deskreve kona-ba kuota ne’ebé fahe ba modalidade haat hanesan veteranu nia oan, membru PNTL nia oan, feto no públiku.
Depois Tribunál Rekursu hatun artigu 42 númeru A ,B no C ne’ebé konsta iha Diploma Ministeriál númeru 17/2025 ne’e inkonstitusionál. Tanba ne’e kandidatu hotu aplika ba rejime jerál.
“Buat ne’ebé daudaun mosu katak teste médiku ne’e PNTL nia oan no veranu nia oan ne’e opiniaun públiku, ne’e direitu ema ida nian atu halo ida-ne’e. Sé mak la satisfáz ho prosesu ne’e iha dalan legál ne’ebé iha, komisaun hala’o nia knaar tuir lei,” nia katak.
Portavós dehan, laiha irregularidade iha prosesu ne’e tanba hahú husi prosesu lubuk ida, hanesan verifikasaun ba dokumentu sira.
“Ita haree no verifika didi’ak prosesu hotu, ita haree dokumentu mak ita halo nia pasa ne’e, sé mak la satisfaz iha prosesu ida karik, deteta buat ruma mak la’ós ba iha ida-ne’e, ha’u hanoin iha direitu atu ba keixa pesoál. Sekretariadu ne’e tenke responde ba buat legál,” nia tenik.
Komisaun Rekrutamentu lakohi fundamenta tanba prosesu teste ne’e hakarek iha depaisu inisteriál ne’e elemináriu, ba teste médiku kuandu pesoál nia kondisaun ba deteta ema ne’e moras maka tenke elemina.
“Ida-ne’e maka rezultadu ita labele taka buat ne’ebé sira hetan, tanba ne’e mak Komisaun iha obrigasaun tenke taka sai sé mak pasa, la pasa tenke ser taka sai,” nia hato’o.
Jornalista : Natalino Costa
Editora : Julia Chatarina
