Edukasaun Kovalima submete ona pedidu levantamentu orsamentu PME 2026
KOVALIMA, 09 Fevereiru 2026 (TATOLI)– Servisu Munisipál Edukasaun (SME) Kovalima submete ona pedidu atu halo levantamentu orsamentu implementa programa merenda eskolár (PME) ba Prezidente Autoridade Munisipiu (PAM) Kovalima.
Edukasaun Kovalima submete ona pedidu atu halo lavantamentu orsamentu PME , nune’e bele hahú implementa PME bazeia ba kalendáriu implementasaun PME ho loron efetivu durante 148.
“Atu implementa programa Merenda Eskolár (PME) iha 2026 ne’e, Ita submete ona pedidu ba Prezidente Autoridade Munisípiu Kovalima, Miguel Armada Cardoso, nune’e Servisu Munisipál Finansa halo prosesu atu halo lavantamentu orsamentu”, Diretora Servisu Munisipál Edukasaun Kovalima, Elda de Fátima,relata ba TATOLI iha Santa- Rosa-Suai-Ohin.
Edukasaun Kovalima halo esforsu iha loron 14 Fevreiru atu implementa PME ba alunu sira husi báziku (EB) no ensinu pre-eskolár (EPE) ne’e, tanba ne’e mak edukasaun Kovalima submete ona pedidu atu halo lavantamentu orsamentu ba programa Merenda Eskolar.
Polítika Implementa Programa merenda eskolár prioriza produtu lokál hanesan foos rai uza durante fulan-tolu de’it tanba estoke laiha ona mak foin sosa foos importadu, maibé modo tahan, naan uza de’it produtu rai-laran.
Orsamentu implementasaun programa merenda eskolár ba iha 2026 ne’e hamutuk $1,223.620 husi orsamentu ne’e sei aloka ba Ensinu báziku $1.098,305 ho nia benefisiáriu 17,669 orsamentu ba Ensinu Pre-Eskolár $125.315 ho nia benefisiáriu hamutuk 2016.
Fó hanoin fali katak, Orsamentu PME tinan 2025 mai munisípiu Kovalima hamutuk milliaun $1,165,375,68 ne’ebé sei aloka ba eskola pre-eskolár hamutuk $110.520 no ba eskola ensinu báziku $1,278.029
Iha implementasaun PME totál alunu ne’ebé benefísia ba PME 2025 ne’e hamutuk 18,828 ne’ebé kompostu hosi eskola pre-eskolár (EPE) alunu hamutuk 1,920, alunu husi eskola báziku (EB) hamutuk 16,828.
Fó hanoin fali katak implementa programa merenda eskolar 2024 hala’o lansamentu iha eskola bázika sentrál Suai-Loro 13 Maiu no iha 2025 implementasaun PME lansa iha Eskola Bázika Sentrál Lontale iha loron 10 Marsu ne’e.
Jornalista: Celestina Teles
Editór: Florencio Miranda Ximenes
