DILI, 10 Fevereiru 2026 (TATOLI)—Autoridade Inspesaun Fiskalizasaun Atividade Ekonómika no Sanitária Alimentár (AIFAESA) halo inspesaun hodi rejista operadór ekonómiku 105 mak komete infrasaun iha fulan-Janeiru 2026.
Notísia Relevante: AIFAESA halo inspesaun ba sigaru ilísitu ne’ebé faan iha merkadu Taibesi
Diretór Departamentu Metereolójia no Padronizasaun AIFAESA, João Cancio Franco, hateten AIFAESA sei elabora dadus hodi submete ba parte jurídiku atu kontinua notifika operadór ekonómiku lokál no internasionál sira-ne’ebé komete infrasaun.
“Infrasaun ne’ebé operadór ekonómiku sira komete mak deteta sasán estragadu, espira (expired) no produtu balun falta rekezitu (reseita hahan). Entaun, ami sei fó notifikasaun ba sira atu deklara razaun tanba kontinua faan iha sira-nia estabelimentu,” Diretór ne’e informa ba Agência Tatoli iha nia kna’ar fatin, Matadoru, ohin.
Dirijente ne’e hatutan, operadór ekonómiku ne’ebé rejista ne’e kompostu husi postu administrativu haat mak hanesan Postu Administrativu Nai Feto, Dom Aleixo, Kristu Rei no Vera Kruz.
“Tanba ne’e husu ba operadór ekonómiku sira atu labele faan produtu ne’ebé espira ona, estragadu no mós produtu ne’ebé halo rasik tenke tau ho informasaun kona-ba produtu nian atu konsumidór bele hatene,” nia apela.
Nia informa, hahú husi Janeiru to’o agora estabelesimentu ne’ebé AIFAESA halo inspesaun hamutuk 673, maibé iha operdór na’in-tolu (3) mak selu ona koima ba kofre Estadu hamutuk rihun $25.500.
Notísia Relevante: Trimestre dahuluk, AIFAESA halo inspesaun ba operadór ekonómiku iha Kristu Rei
Jornalista : Alexandra da Costa
Editór : Cancio Ximenes
