DILI, 10 Fevereiru 2026 (TATOLI)-Prezidente Komisaun Nasionál Eleisaun (CNE, sigla portugés), José Agostinho da Costa Belo, dehan inisiativa Governu nian ba alterasaun Lei Partidu Polítiku importante tebes no tenke reprezenta valór demokrátiku pluralizmu iha organizasaun forsa polítika.
Tuir nia, iha preámbulu proposta alterasaun lei ne’e iha pontu rua importante mak partidu iha mundu modernu tenke iha valór sira ne’ebé pluralizmu, katak labele kontráriu ho monárkia ba prátika sira ne’ebé feudál nian.
“Tenke la’o tuir valór demokrátiku pluralizmu, katak la’ós tanba aliran no grupu ida-ne’e no ne’ebá, maibé partidu ne’e forma husi sidadaun ne’ebé ninia vizaun no misaun hanesan fó fiar ba instrumentu ida-ne’e atu reprezenta sira iha lian”, nia hateten.
Daruak mak iha proposta alterasaun ne’e mós tau atensaun ba sede partidu polítiku tenke iha hodi sira kanaliza informasaun no sai modelu reprezentasaun ne’ebé di’ak ho kualidade atu diskute sosiedade ninia problema.
“Sede ida-ne’e importante atu organizasaun funsiona ho di’ak, sai fatin hodi bele forma no produs kuadru no lideransa di’ak, maibé realidade durante ne’e la hanesan ne’e”, nia hato’o.
Prezidente CNE sujere atu iha alterasaun ne’e presiza haree, liuliu iha estrutura partidu iha sistema proporsionalidade, tau kritériaa méritu, haree dupla funsaun, liuliu iha tendénsia ho arte marsiál, distingi organizasaun arte marsiál ho partidu.
“Tanba ne’e, rekizitu ba oin tenke forte liután, la’ós harii de’it partidu, hanoin sai deputadu no ministru. Tenke iha kapasidade, tanba agora ita tama ona ASEAN, presiza kompetisaun ne’ebé di’ak”, nia sujere.
Lembra katak iha reuniaun plenária Parlamentu Nasionál 09 Fevereiru ne’e, meza baixa ona proposta Lei númeru 26/VI(3a)-alterasaun daruak Lei númeru 3/2004, 14 Abríl, kona-ba Partidu Polítiku ne’ebé aprezenta husi Governu ba Komisaun A ne’ebé trata Asuntu Konstituisionál no Justisa hodi halo apresiasaun inisiál.
Notísia relevante: https://tatoli.tl/2026/01/20/deputadu-sira-konkorda-ho-alterasaun-lei-partidu-politiku-atu-adapta-ba-realidade/
Jornalista: Nelson de Sousa
Editora: Maria Auxiliadora
