DILI, 10 Fevereiru 2026 (TATOLI)—Fundasaun Mahein prefere Governu kria komisaun independente ida hodi investiga prosesu rekrutamentu ba membru foun Polísia Nasionál Timor-Leste (PNTL) 2025.
Diretór Fundasaun Mahein, Nelson Belo, nota preokupasaun públiku, katak rekrutamentu ne’e mosu irregularidade barak.
“Suspensaun hanesan horisehik ne’e ami dehan sim, maibé tenke bazeia ba investigasaun no hanoin katak Governu bele kria komisaun independente ida atubele halo investigasaun no rona alegasaun sira ne’ebé mak públiku rejista,” Diretór hato’o ba Jornalista sira hafoin hasoru ho Komandante Jerál PNTL, Komisáriu Jerál Polísia Henrique da Costa, iha Kuartel Jerál PNTL, Kaikoli, Tersa ne’e.
Notísia relevante : Komisaun Rekrutamentu deside halo adiamentu teste médiku ba aplikante vaga PNTL
Nia dehan, Komisaun ne’e tenke mai husi ema profisionál no kredibilidade nune’e atu rejista alegasaun husi públiku no fó solusaun.
Aleinde ne’e, entidade rua aborda preokupasaun públiku ba prosesu rekrutamentu.
“Ami hato’o ami-nia sujestaun ba Komandu oinsá instituisaun ne’e hala’o nafatin nia knaar ho di’ak, lamentasaun sira ne’ebé husi públiku husu Ministériu Interiór atubele responde nune’e bele kria mekanizmu hodi akumula lamentasaun,” nia katak.
Fundasaun Mahein iha biban ne’e la fó rekomendasaun ruma ba rekrutamentu membru PNTL.
“Enkontru ne’e kortezia, entaun ami la halo rekomendasaun ida ba Komandu Jerál, maibé opiniaun ne’ebé ami iha katak rekrutamentu ne’e nafatin la’o ba, maibé alegasaun ne’ebé mak akontese públiku rejista ona no presiza esplikasaun,” nia subliña.
Kestiona MI nia kapasidade foti desizaun
Iha sorin seluk, Diretór Ezekutivu Fundasaun Mahein, Nelson Belo, kestiona MI nia kapasidade foti desizaun hodi solusiona polémika rekrutamentu membru foun PNTL.
“Desizaun atu suspende ka anula ne’e tanba saida mak tenke hein Konsellu Ministru, tanba saida mak Ministru hotu-hotu tenke hein desizaun Konsellu Ministru, entaun Ministru hotu-hotu la hatene halo desizaun, entaun sira lori bá Konsellu Ministru mak halo desizaun ba sira,” Nelson lamenta.
Nia dehan, Ministru tenke uza kompétensia hodi rezolve polémika ne’e.
“Tuir loloos Ministru ne’ebé mak kompotente tenke halo desizaun, sira labele enak-enak de’it, oituan-oituan sira lori bá Konsellu Ministru mak halo desizaun, ida-ne’e di’ak loos, sira labele halo hanesan ne’e, Ministru mak tenke iha kompeténsia ezekutivu atu halo desizaun, sé lori fali bá Konsellu Ministru maka Ministru laiha kapasidade,” nia afirma.
Diretór ne’e nota, Ministru la konsege rezolve problema iha internál hodi esplika prosesu ne’e hanesan aspeitu polítika.
“Labele dudu ba PNTL hanesan prosesu ida-ne’e hakarak fase liman lakoi responsabalidade. Ministru tenke asume nia knaar katak desizaun ne’ebé mak nia presiza tenki foti, lalika hein Konsellu Ministru. Desizaun foti bainhira iha alegasaun mosu iha públiku maka’as, entaun ida-ne’e konkista atensaun polítiku sira, entaun Ministru podia halo desizaun, tanba saida tenki bá Konsellu ministru,” nia katak.
Diretór hatutan: “Ida-ne’e kabe ba ministériu ne’e halo desizaun. Tanba kestaun rekrutamentu ne’e buat kiik, ne’e Ministru bele uza nia kompeténsia hodi rezolve ida-ne’e.
Jornalista : Natalino Costa
Editora : Julia Chatarina
