DILI, 10 Fevereiru 2026 (TATOLI)–Ekipa Na’in-Feto Football Club (FC) susesu dere UNITAL FC ho skor 7-1, enkuantu AD SLB gaña pontu tolu hafoin manán Maranatha ho skor 4-0 ne’ebé hala’o iha Kampu Federasaun Futeból Timor-Leste (FFTL), Domingu (08/02/2026).
Ekipa promovida Na’in-Feto FC susesu dere UNITAL ho skor 7-1 hafoin lidera uluk skor liuhusi golu jogadora Siti Retno Sari iha minutu 18 no hafoin ne’e jogadora adversária, Floriana Viana konsege oferta golu ida (1) iha minutu 34 halo skor sai impata 1-1.
Maski nune’e, Na’in-Feto FC aumenta tan golu neen (6) iha parte daruak liuhusi golu rua husi jogadora Anisya Widyawati iha minutu 61 no 70, golu rua seluk husi Ellen Tria iha minutu 69 no 78, enkuantu golu rua seluk produs husi jogadora Marcia Chaves minutu iha 80 no auto-golu husi UNITAL liuhusi Rosa da Costa iha minutu 55.
Mezmu Na’in-Feto FC rekolla pontu tolu (3) maibé seidauk salva husi zona mean no mantein iha pozisaun dasiak (9) ho pontu hitu (7) hafoin manán jogu rua (2), impata 1 (ida) no derrota jogu sia (9). Enkuantu, UNITAL FC kontinua iha pozisaun dahitu hafoin derrota jogu sia (9) no manán iha jogu tolu (3) ho totál pontu sia (9).
Iha loron hanesan, AD SLB ne’ebé iha pozisaun daruak manán Maranatha FC ho skor 4-0 bainhira jogadora Sónia Amaral sai eroina liuhusi prodús golu rua iha minutu 37 no 60, entretantu golu rua seluk aumenta husi jogadora Elvira da Silva iha minutu haat (4) no Astri Songe iha minutu 15.
Ho rezultadu jogu entre ekipa rua, rezulta Maranatha FC iha pozisaun dalimak (5) hafoin rekolla pontu 18 bainhira manán jogu lima (5), imapta tolu (3) no derrota haat (4), enkuantu AD SLB fortifika iha pozisaun daruak ho pontu 29, rezultadu husi manán jogu sia (9), impata rua (2) no derrota ida (1).
Jornalista: Natalino Belo
Editór: Xisto Freitas da Piedade
