DILI, 17 Fevereiru 2026 (TATOLI)–Ekipa futeból femininu Kulugisa to’o jornada 13⁰ kontinua sofre derrota bainhira kontra Buibere Football Club (FC) ho rezultadu skor 0-19 iha Liga Futeból Femininu Timor-Leste (LFFTL).
Kulugisa FC ne’ebé hala’o jogu kontra Buibere FC iha Kampu Federasaun Futeból Timor-Leste (FFTL), Kuarta (12/02/2026), laiha rezisténsia atu halo kontra-atake husi Buibere FC nune’e rezulta simu golu lima (5) iha parte dahuluk.
Notísia relevante: Kulugisa FC iha zona mean, AD SLB lidera hikas tabela klasifikasaun LFFTL
Golu lima referidu Buibere FC prodús liuhusi jogadór sira hanesan Novénia Gabriela iha minutu 18, Deonísia Guimarães 23 no 35 no Merícia Barbosa 37.
Iha parte daruak, ekipa onze husi Munisípiu Baukau kontinua sofre golu hamutuk 14 iha-ne’ebé Buibere enxe liuhusi jogadora hanesan golu rua husi Epifânia Soares, Deonísia Guimarães golu rua, Marcia Barbosa golu rua, Isabelita golu tolu, Novénia golu rua inklui rua seluk husi jogadora Tarcia Duarte no Ivánia Santos.
Ho rezultadu jogu referidu, Kulugisa FC kontinua iha pozisaun dasanuluk ho pontu 0 no menus golu (+/-) 150, enkuantu Buibere FC rekolla pontu 32 no mantein iha pozisaun datoluk iha tabele klasifikasaun LFFTL.
Jornalista: Natalino Belo
Editór: Xisto Freitas da Piedade
