DILI, 13 Fevereiru 2026 (TATOLI)–Ministru Obra Públika (MOP), Samuel Marçal, sesta ne’e, hasoru malu ho Prezidente Repúblika José Ramos-Horta hodi aprezenta dezeñu jardin ne’ebé Governu sei konstrui husi diresaun Ponte B. J. Habibie to’o Kristu Rei.
“Ami mai ne’e Prezidente Repúblika mak bolu atu halo aprezentasaun kona-ba jardin ne’ebé Governu atu konstrui husi Ponte Habibie to’o Kristu Rei nian. Prezidente konkorda no Prezidente rasik mós iha planu ona halo estatua Lafaek ida-ne’ebé daudaun ne’e halo hela iha Xina. Bainhira Lafaek ne’e to’o mai sei tau iha rotunda Metiaut ne’e, iha dalan ba Kristu Rei no dalan sa’e ba rezidénsia Prezidente nian ne’e,” Ministru Samuel hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, Prezidente Ramos-Horta kontente tebes bainhira haree aprezentasaun husi MOP no husi konstrusaun bele hahú daudaun ona.
“Jardin ne’e ita foin hahú dezeñu, entaun tempu besik mak ita foin hakat ba prosesu sira. Prezidente konkorda ona, agora ami sei halo nia detalladu atu bele hakat ba nia implementasaun,” Ministru ne’e tenik.
Kona-ba orsamentu, Ministru Samuel hateten, sei iha prosesu no seidauk hatene totál orsamentu.
“Orsamentu ita seidauk hatene, maibé sei halo kalkulasaun oinsa orsamentu hira ha’u sei fó sai ba públiku, empreza ne’ebé atu ka’er obra ne’e ita seidauk hatene. Bainhira loke konkursu públiku, empreza sira ba konkore sé mak manán, nia mak sei kaer, agora seidauk,” nia hateten.
Bainhira konstrusaun ne’e la’o, Governu sei sobu hotu uma ne’ebé okupa iha área referida.
“Uma sira iha tasi ibun husi Ponte Habibie nian to’o Kristu Rei, ita sei sobu hotu. Prezidente konkorda atu hasai, Prezidente dehan se ninia uma mak afetadu mós tenke hasai hotu no nia la husu konpensasaun. Entaun, ha’u atu avizu hela ba malu sira iha parte tasi ibun ne’ebá, ita sei alista hotu hafoin sobu. Sira-ne’ebé halo negosiante tenke prepara kondisaun ne’ebé di’ak-liu. Bainhira konstrusaun ramata, sira bele fila-fali ba halo sira-nia negósiu iha jardin laran, sira ne’ebé hasai permanente ita sei fó idemnizasaun,” nia dehan.
Governu realiza konstrusaun hirak ne’e tanba daudaun ne’e Timor-Leste tama ona hanesan membru ASEAN, ho nune’e Governu iha tinan 2026 sei foku liu ba oinsá hadi’a setór infraestrutura.
Jornalista : Hortencio Sanchez
Editór : Cancio Ximenes
