DILI, 07 Abríl 2026 (TATOLI)—Ministra Edukasaun, Dulce de Jesus Soares no Country Director Peace Corps (Korpu da Pás), Jamie Fouss, Tersa ne’e, asina akordu ba renovasaun akordu ba dezenvolvimentu lian ingléz iha terseiru siklu no ensinu sekundáriu iha territóriu nasionál.
“Peace Corps nia membru voluntáriu hamutuk 19 mak daudaun ne’e iha. Na’in-rua apoiu ba dezenvolve kurríkulu ba terseiru siklu no na’in-17 seluk iha eskola ensinu báziku terseiru siklu enkuantu iha ensinu sekundáriu hodi reforsa manorin nia metodolojia iha ensinu lian ingléz,” Ministra Edukasaun, Dulce de Jesus Soares, hato’o ba Jornalista sira hafoin asina nota entendimentu entre ME no Peace Corp, iha salaun VIP, Vila-Verde, Tersa ne’e.
Kooperasaun ne’e la’ós programa foun maibé atu fó kontinuidade ne’ebé iha ona. Antes ne’e asina akordu ba tinan-lima no ohin ba faze daruak nian ba tinan-lima, hodi dezenvolve lian ingléz iha terseiru siklu no ensinu sekundáriu nian iha munisípiu hotu-hotu.
Ministra dehan, voluntáriu sira destaka iha munisípiu hotu no hela ho komunidade maibé atu destaka iha eskola ida, Autoridade Munisipál sira mak hatene no halo jestaun tanba sira mak mai simu membru voluntáriu sira husi Peace Corps.
“Ami rekoñese katak formasaun profesór sira iha área lian Ingléz nu’udar área ida-ne’ebé INFORDEPE presiza tebes, nune’e faktu katak voluntáriu Korpu da Pás balun ho laran di’ak fó ona sira-nia tempu no matenek ba formasaun ida-ne’e iha tinan kotuk, no sei hahú fali iha fulan ida-ne’e, ne’e apresia tebes,” Ministra Dulce apresia.
Notísia relevante : Joven-sira iha papél importante kontribui ba hametin dame iha sosiedade
Governante hateten, Timor-Leste valoriza apoiu husi parseiru Peace Corps ba dezenvolvimentu lian ingléz ba eskola sira iha Timor-Leste.
“Ita hein atu hametin liután kooperasaun ida-ne’e iha futuru. Peace Corp nia abilidade atu fornese ami ho voluntáriu sira depende ba Governu EUA nia finansiamentu, maibé ha’u hakarak repete iha ne’e katak, hanesan baibain, ami sempre hamriik no prontu atu simu kualkér kuantidade voluntáriu ne’ebé ita-boot bele fó. Se ita iha voluntáriu ida iha terseiru siklu no eskola sekundária ida-idak, ida-ne’e sei sai bensaun ida ba kualidade ita-nia eskola sira-nian,” Dulce dehan.
Nune’e mós, Country Director Peace Corps, Jamie Fouss, relata, Peace Corps nia voluntáriu sira serbisu hamutuk ho eskola sira hodi hadi’a manorin sira-nia jestaun iha saladeaula, métodu hanorin lian ingléz no daudaun ne’e apoia no dezenvolve kurríkulu ba sétimu anu.
“Ha’u kontente loos atu asina renovasaun nota atendimentu ida-ne’e ho Ministériu Edukasaun atu kontinua kolabora no suporta edukasaun, liuliu matéria ingléz ba terseiru siklu no ensinu sekundáriu,” nia reforsa.
Jornalista : Osória Marques
Editora : Julia Chatarina
