Irrigasaun Sulilaran tama iha prioridade 2027
BOBONARU, 01 Abríl 2026 (TATOLI)-Diresaun Servisu Munisipál Agrikultura (DSMA) Munisípiu Bobonaru observa irrigasaun Sulilaran, iha suku Aidabaleten, postu administrativu Atabae, no identifika ona atu tama ba prioridade ba reabilitasaun iha Planu Dezenvolvimentu Integradu Munisipál (PDIM) 2027 hodi fornese bee ba natar ektare 350.
Diretór Servisu Munisipál Agrikultura Bobonaru, Longuinhos João, hateten katak irrigasaun ne’e sei sai prioridade planu investimentu munisipál tinan oin, tanba natar potensiál boot mak abandonadu.
Notísia relevante: MAP hahú tau atensaun ba irrigasaun antigu iha Atabae
Xefe aldeia Sulilaran, Luciano Pires, salienta kataka nia fiar Governu sei konsidera no aprova prioridade ne’e, tanba durante ne’e problema irrigasaun ladi’ak afeta ba natar ektares 350 sai abandonadu.
“Tinan-tinan ami halo ektare 155. Se Governu aproveita lahan tidur sira ne’e, ami bele halo to’o ektare 500”, nia dehan.
Iha biban ne’e, reprezenta komunidade, Marçal Sae Buti, mós husu ba Governu atu fornese mákina hand-tractor hodi fasilita agrikultór sira iha atividade halo natar.
“Uluk Governu apoia duni tratór unidade ida de’it. Husi 2008 to’o agora, área natar aumenta tan, halo ami enfrenta difikuldade tanba ami uza tratór ema nian privadu. Tanba ami uza udan-been, entaun udan mai primeiru ne’e ami tenke iha tratór para fila kedas rai halo pembibitan”, nia hateten.
Durante vizita, Diretór Longuingos mós halo distribuisaun ekipamentu hand sprayer no pestisida hodi preve hare husi peste Nago, tanba daudaun hare tama ona iha faze jenerativa.
Notisia relevante: Irrigasaun Maliana II la funsiona, Natar Soso nakonu ho fatuk no rai-henek
Jornalista: Sergio da Cruz
Editora: Maria Auxiliadora
