iklan

BOBONARO, EKONOMIA, HEADLINE, MUNISÍPIU

Irrigasaun Maliana II la funsiona, Natar Soso nakonu ho fatuk no rai-henek

Irrigasaun Maliana II la funsiona, Natar Soso nakonu ho fatuk no rai-henek

Komunidade sira fakar ona rai-henek no fatuk iha natar área Soso, suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 29 juñu 2022 (TATOLI) – Natar ne’ebé lokaliza iha Soso nakonu ho fatuk no rai-henek tanba impaktu hosi irrigasaun Maliana II la funsiona.

Xefe suku Holsa, postu administrativu Maliana, munisípiu Bobonaro, António Santa Cruz, esplika, oras ne’e daudaun komunidade no empreza balun hahú fakar rai-henek no fatuk, no balu konstrui ona uma iha natar área Soso tanba kauza hosi irrigasaun Maliana II  ne’ebé la funsiona durante tinan barak ona.

Nia observa rai hirak-ne’e katak tinan agrikultór sira halo produsaun hare no batar dependénsia liu ba udan-been nune’e obrigatóriu tenke halo époka dahuluk de’it tanba debitu bee menus nune’e sai fatór determinante hodi hamenus komunidade nia vontade atu halai natar.

Notísia relevante:PA Bobonaro preokupa komunidade halo uma iha natar Maliana

“Ita haree irrigasaun Maliana II ate ohin loron seidauk hetan konstrusaun,ida-ne’e sai preokupasaun komunidade nian, tanba bee la to’o, entaun sira dehan duké ha’u hein loron kalan bee laiha, nusá ha’u la halo atividade seluk, até balu baruk ona fa’an fali ba ema seluk hodi halo uma,” nia informa ba jornalista Tatoli, iha kna’ar-fatin, kuarta ne’e.

Komunidade sira fakar ona rai-henek no fatuk iha natar área Soso, suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

Tuir nia observasaun katak, natar sira iha Soso, Maliana dezde tempu Indonézia to’o ukun-aan, iha de’it uma kiik sira.

Maibé oras ne’e Timor-Leste mós tama ona iha era globalizasaun, ema hotu utiliza nia direitu, natar hirak-ne’e nakfilak sai nakonu ho uma, rai-henek no fatuk ho rai henek tanba estadu seidauk kria lei ida atu bandu komunidade sira halo uma iha área potensiál sira-ne’e.

Kestaun ne’e sai preokupasaun ba boot ba xefe suku Holsa ne’e, maibé laiha kompeténsia atu halo intervensaun tanba nasaun RDTL adota hela sistema direitu demokrátiku no sidadania.

Tanba ne’e komunidade iha direitu atu halo atividade agrikulutura no halo konstrusaun tanba natar pertense iha Soso Maliana ba to’o Nunura maoria pertense ba proprietária privada.

“Maibé ha’u la konkorda, enkuantu rai produtivu sira uza ba natar, uza halo fali atividade la’ós agrikultura nian, ida-ne’e hanesan ita hamate ona produsaun lokál iha munisípiu Bobonaro, ne’ebé uluk tempu Indonézia kedas koñesida ho lumbung beras,” nia hateten.

Nia fundamenta, durante ne’e komunidade ne’ebé fakar-rai henek no fatuk iha natar laran no balu fa’an rai ba empreza sira, laiha koñesimentu hosi autoridade lokál sira-ne’ebé nudar ukun iha área refere.

“Buat demokrasia ne’e mak obriga ema hotu-hotu bele halo buat saida de’it, konforme sira-nia hakarak, ohin loron ha’u bele halo uma, aban ha’u bele halo fali natar ka buat seluk ida, tanba ne’e ami mós labele halo intervensaun, ne’ebé ita hakfodak uma hamriik tiha ona, balu foin fakar daudaun rai-henek ho fatuk,” nia hatutan.

Autoridade lokál ne’e rekomenda ba governu presiza kria lei ka regulamentu ruma nune’e regula komunidade sira no trava lalais konstrusaun iha natar ne’e.

Nia husu Ministériu Agrikultura no Peska (MAP) tenke realiza ona promesa katak iha tinan ne’e tau prioridade atu konstrui irrigasaun Maliana II atubele fornese bee ba natar pertense ba agrikultór suku Holsa, Odomau no Tapo-Memu nune’e bele halo produsaun époka dala rua iha tinan ida. 

Natar iha Bobonaro ektare rihun-neen

Iha parte seluk, Diretór Servisu Agrikultura no Peska, Munisípiu Bobonaro, Alberto Gomes Lopez, fó-sai katak área kultiva hare époka dahuluk tinan 2022 ne’ebé agrikultór sira uza halo produsaun atinje ektare 6.000.

“Ami-nia hare tinan ida ne’e udan-been di’akliu, ami halo nia estimasaun potensialidade ne’ebé agrikultor sira halo natar tinan ida ne’e perkore totál 6,000 mill ektare iha postu hotu iha munisípiu Bobonaro,” nia informa ba Tatoli, iha kna’ar-fatin, segunda ne’e.

Nia informa, bazea ba dadus ne’ebé tékniku sira rekolla área kualtiva tinan kotuk atinje de’it ektare 5.000 maibé tinan ne’e tanba programa governu gasta millaun $80 atu sosa agrikultór sira-nia produsaun nune’e konsege alarga to’o aktare 6.000.

Alberto subliña, ho aumenta área espansaun ne’e la’ós fó vatajen di’ak ba kuantidade produsaun maibé lori fali desvatajen tanba mudansa klimátika rezulta frekuénsia udan- been maka’as liu neseseidade ne’ebé natar na’in sira presiza, ikus mai fó impaktu ba ninia rezultadu kolleta.

“Ema hotu hare ne’e presiza bee maka’as, maibé bee ne’e kuandu aas liu difisíl nia atu dada is iha rai laran, entaun fo impaktu ba nia rezultadu, tama ninia pertumbuhan vegetative ne’e bele di’ak, maibé orsida nia to’o iha faze ida atu fó fuan ne’e nia bele tún tanba iha rai-laran la fó biban atu apoia nia fuan,” nia esklarese.

Nune’e mós akontese inundasaun rezulta mota sobu estraga agrikultór área ponte Loes, parte Nundoi, suku Atabae, postu administrativu Atabae nia natar kuaze ekatre 20-resin la konsege kolleta.

Alberto subliña, ho problema ne’e halo agrikultór sira konsege kolleta kada ekatre atinje de’it tonelada 3,5 maibé dadus ne’e foin rekolla de’it postu iha Maliana vila, enkuantu postu administrativu Atabae, Balibo no Cailaco sei iha prosesu elaborasaun.

Daudaun ne’e servisu agrikultór munisípiu Bobonaro halo hela preparasaun époka daruak nia hanesan sosializa ba programa governu nia gasta millaun $80 sosa agrikulór nia produtu lokál, halo ona manuntensaun irrigasaun ne’ebé hetan estragu hosi inundasaun.

“Agora sira iha Atabae mós komesa atu kuda époka daruak nian, agora iha Maliana laran ne’ebé utiliza irrigasaun Maliana I, komesa ona prosesu fila-rai la’o daudaun ona, maibé sira hosi Maliana II labele tanba irrigasaun to’o agora seidauk di’ak bee laiha nune’e sira halo de’it primeira époka,” nia hateten.

Notisia Relevante:Diálogu entre komunidade ho Lú Olo, MAP prioritiza kedas irrigasaun Maliana II

Jornalista   : Sérgio da Cruz

Editór         : Evaristo Soares Martins

 

iklan
iklan

Leave a Reply

iklan
error: Content is protected !!