Dili, 11 Fevereiru 2026 (TATOLI)-Ministra Finansa, Santina Cardoso, hateten Prezidente Repúblika Jos’é Ramos-Horta sei fó pose ba Vise-Ministra foun ho naran Regina de Jesus hodi troka Vise-Ministra Finansa sesante ne’ebe rezigna-an husi nia kargu.
Notísia Relevante: Prezidente Repúbika fó posse ba Vise-Ministra Finansa
Nomeiasaun ne’e publika ona iha Jornál Repúblika iha 10 Fevereiru 2026 ne’e, fó sai katak nomeada kargu Vise-Ministra Finansa ba Regina de Jesus, ne’ebé antes ne’e hanesan Diretora Jerál Tezouru no dekretu ne’e prodús efeitu husi data publikasaun nian.
“Kona-ba Vise-Ministra foun ne’e aban simu pose. Vise ne’e agora ko’alia hela ho ha’u, mak Diretóra Jerál Tezouru, Regina de Jesus,” Ministra ne’e informa ba jornalista sira hafoin ramata enkontru iha Konsellu Ministru ne’ebé hala’o iha Palásiu Governu, ohin.
Bazeia ba nota informativu ne’ebé Agência Tatoli asesu katak daudaun ne’e Regina Soares asume kna’ar hanesan Diretora Jerál Tezouru iha Ministériu Finansa.
Entretantu antes ne’e Vise- Ministra Finansa, Felícia Carvalho, submete ona karta rezignasaun ba Konsellu Ministru iha semana hira ba kotuk, maibé to’o ohin loron Xefe Governu seidauk iha hanoin atu buka ema ruma substitui nia fatin.
“Nia sai tanba saida ne’e ba husu ba nia. Ha’u mak hasai entaun husu mai ha’u. Nia mak rezigna-an entaun husu ba nia,” PM Xanana hateten ba jornalista sira iha Palásiu Prezidensiál Nicolau Lobato, Bairru Pite.
Jornalista : Alexandra da Costa
Editór : Cancio Ximenes
