DILI, 11 Fevereiru 2026 (TATOLI)—Kondisaun klima (bailoro naruk) ameasa produtu agríkola iha Suku Kaikua, Postu Administrativu Vemasse, Munisípiu Baukau, falla kolleta iha tinan-ne’e.
Xefe Suku Kaikua, Postu Administrativu Vemasse, Aníbal Henrique da Costa esplika kondisaun referida impaktu husi intensidade udan ne’ebé la regulár, iha-ne’ebé ameasa ai-han ne’ebé kuda hanesan batar no hare.
“Tinan-ne’e udan-been ladún di’ak halo batar no hare mate hotu nune’e ameasa komunidade menus ai-han,” Xefe Suku Kaikua informa ba TATOLI liuhosi telefónema, Kuarta ne’e.
Aníbal da Costa relata, maioria komunidade iha Kaikua hala’o vida agrikultór iha-ne’ebé asesu ba udan-been liuhusi mota ne’ebé maihusi Ossú, Venilale, Ossoala nune’e kanál irrigasaun menus bee afeta ba ai-han ne’ebé komunidade kuda iha toos no natar.
Nia rekomenda ba institusaun relevante atu tau-atensaun ba situasaun referida hanesan apoia aselera konstrusaun irrigasaun no ai-han ho razaun la’ós komunidade mak laiha inisiativa halo toos maibé mudansa klima afeta udan-been menus iha tinan-ne’e.
“Husu ba Ministériu Solidaridade Sosiál atu fó apoiu sosiál tanba ami-nia suku durante ne’e seidauk hetan,” Aníbal da Costa rekomenda.
Entretantu, Suku Kaikua hamutuk aldeia rua hanesan Kaikua no Bahamori ho totál populasaun hamutuk 1.972 husi uma-kain 476, iha-ne’ebé eziste toos iha ekatare 151 no natar ektare hamutuk 46.
Jornalista: Natalino Belo
Editór: Xisto Freitas da Piedade
