DILI, 11 Fevereiru 2026 (TATOLI)—Fundasaun ASSA hamutuk ho Fundu Dezenvolvimentu Kapitál Umanu (HDCH, sigla portugéz) atribui sertifikadu lian ingléz ba Ofisiál Justisa na’in-45 husi Ministériu Públiku (MP), hafoin konklui kursu durante fulan-neen nia laran hodi eleva sira-nia koñesimentu.
Diretor Ezekutivu Fundasaun ASSA, Bendito Kay Assa, hateten, fundasaun ne’e halo kooperasaun serbisu ho Prokuradoria Jerál Repúblika (PJR) liuhusi asina entendimentu ida no enkontru prelimináriu hodi hala’o teste ba formadu sira.
“Tanba ne’e, kontinua kedas halo planu ba aula formasaun no fó teste médiu ba sira. Hotu ami kontinua teste finál ikus mai ami entrega sertifikadu, ne’ebé ohin realiza hanesan símbolu ida ba sira-nia susesu durante formasaun fulan-neen nian laran. Sira hamutuk nain-45,” Diretór Bendito hato’o hafoin atribui sertifikadu ba Ofisiál Justisa na’in-53 iha salaun PJR, Kolmera, Kuarta ne’e.
Notísia relevante : Reforsa setór justisa presiza aumenta rekursu umanu-formasaun espesializada
Durante formasaun Fundasaun ASSA avalia formandu nia progresu kursu liuhusi teste médiu no finál. Halo teste entrevista eskrita no orál hodi hatene formandu nia abililidade no koñesimentu iha lian ingléz, no ikus mai atribui sertifikadu.
Objetivu kursu ne’e atu hasa’e Ofisiál Justisa iha PJR sira-nia koñesimentu iha lian Ingléz hodi halo komunikasaun espesiál bainhira iha enkontru iha nível Asosiasaun Nasaun Sudeste Aziátiku (ASEAN, sigla ingléz).
“Ami nota katak, sira-nia koñesimentu formasaun lian ingléz ne’e pozitivu tebes no sira mós rekomenda atu kontinua formasaun tuir mai iha lian ingléz no sira seluk,” nia akresenta.
Iha fatin hanesan, Prokuradór Jerál Repúblika, Nelson de Carvalho, agradese ba Fundasaun ASSA ne’ebé kontribui oferese formasaun tanba iha PJR iha Gabinete tolu hanesan Kombate Korrupsaun, Krime Kontesioza no Kooperasaun Judisiáriu ne’ebé mak presiza Ofisiál Justisa sira-nia tulun ba translate lian.
“Ha’u toma nota ona prepara ita-boot sira-nia an rasik, tanba ita tama ona ba ASEAN maibé buat importante ba Timor ne’ebé mak ko’alia iha lian haat mak hanesan tetun, ingléz, portugéz no indonézia. Ita-boot sira bele sai pontu fokál tanba tama ASEAN presiza lian ingléz,” nia fundamenta.
Ofisial Justisa na’in-45 ne’ebé iha ona koñesimentu iha lian ingléz, ba oin sei koloka na’in-ida ka rua sai Adjuntu PJR Kooperasaun Internasional, Jacinto Belo ba área kooperasaun judisiariu.
“Oportunidade ida-ne’e sei la para iha ne’e, tanba lingua atu hariku ita-nia an iha mundu, ema barak sempre ko’alia ingléz. Ita-boot sira mos agora prepara atubele sai tradutór iha materiál ne’ebé iha Ministériu Públiku, karik iha julgamentu ema ne’ebé mak estranjeiru persiza tradús lian ingléz, tanba nee tenke prepara ona an,” nia katak.
Jornalista : Natalino Costa
Editora : Julia Chatarina
