DILI, 11 Fevereiru 2026 (TATOLI)—Ministra Saúde, Élia dos Reis Amaral, hateten konstrusaun pediatria andár lima iha Hospitál Nasionál Guido Valadares (HNGV) daudaun ne’e atinje ona 70%, tanba ne’e iha tempu badak empreza China Civil Engineering Construction Corporation (CCECC) sei entrega ba Governu no sei bele utiliza.
“Progresu ba oin ha’u hanoin la’o ona. Iha semana rua liuba ne’e, ita iha 68%. Ha’u hanoin agora ita iha ona mais 70% resin,” Élia dos Reis Amaral hateten ba jornalista sira hafoin partisipa iha reuniaun Konsellu Ministru iha Palásiu Govenu, ohin.
Nia dehan, daudaun ne’e sira akompaña hela instalasaun oksijéniu no ba iha instalasaun ekipamentu médiku no naun médiku sira, nune’e bele utiliza ona.
“Ita mós hein akompaña mós instalazaun oksijéniu ho mós ba iha instalasaun ekipamentu médiku no naun ekipamentu médiku, ne’ebé mak ita espera katak iha tempu badak ita sei halo instalasaun ,atu nune’e ami sei informa fali ba ita-boot sira bainhira mak bele entrega no bele utiliza ka operalizasaun ba iha ospitál refere. Kkona-ba ekipamentu daudaun ne’e iha hela prosesu nian laran,” nia dehan.
Konstrusaun edifísiu pediatria andar lima iha HNGV ne’e konstrui hosi empreza China Civil Engineering Construction Corporation (CCECC) ne’ebé Governu Konstitusionál da-ualu (VIII) liuhusi Ministériu Saúde kontrata ho orsamentu hamutuk millaun $9,5.
Antes ne’e, Diretór Servisu Apoiu Diagnóstiku no Terapeutiku iha HNGV, Vidal de Jesus, informa kona-ba konstrusaun edifísiu pediatria andar lima ne’ebé mak daudaun ne’e iha Hospitál Nasionál Guido Valadares ne’e, empreza sei entrega iha fulan Maiu ka Juñu 2026.
“Kona-ba andar lima ne’e tuir loloos husi Ministériu Saúde liuhusi Unidade Jestaun Grande Projetu mak fó sai mais komu ita-boot sira, husu ona ha’u bele relata. Tuir infomasaun katak tanba sei iha prosesu administrasaun no buat seluk provabilmente fulan Maiu no Juñu sira-ne’e mak sei entrega ofisiálmente no ita bele uza ona,” Diretór Servisu Apoiu Diagnóstiku no Terapeutiku iha HNGV Vidal de Jesus ba Jornalista sira iha nia kna’ar fatin.
Kona ba ekipamentu sira-ne’ebé mak atu tau iha ospitál andar lima refere iha ona planu, tanba edifisu ne’e prontu entre prienxe ho ekipamentu médiku no naun médiku ba laran.
” Ekipamentu sira-ne’e iha ona, tanba tama ona. Edifisu ne’eba kuandu prontu labele mamuk ita tenke prienxe ho ekipamentu médiku no naun médiku ne’e iha ona, ne’e Ministériu Saúde mak reponsabilidade tanba HNGV ne’e hanesan uzer de’it. Depois fó rekomendasaun no hanoin saida-saida mak presiza orsida sosa ne’e Ministériu Saúde mak sosa,”nia informa.
Nia esplika, kona-ba rekursu umanu atu prienxe iha edifísiu pediatria andar lima ne’e, tempu badak Hospitál Nasionál Guido Valadares sei halo rekrutamentu.
“Rekursu umanu ne’e tempu badak ami sei halo rekrutamentu maibe ne’e husi HNVG, orsamentu ne’e alokadu husi HNVG nian planu rasik mak hodi prepara. Tanba ne’e mak iha tempu badak sei halo, maibé alvu ne’e imi hein de’it tanba hanesan loron hirak liu ba ne’e ha’u dehan 300 pesoál saúde. Entaun ita aumenta bazeia ba planu orsamentu, maibé depende ba nesidade volume servisu tanba servisu iha ne’e dinamiku. Importante planu ne’e klaru, orsamentu alokadu ne’e ita la halo ulun moras. Kuandu orsamentu laiha ne’e mak halo ita ulun moras iha 2026 ne’e, orsamentu bem alokadu, planu feitu ne’ebé hein ita ezekuta de’it,” nia hateten.
Jornalista : Felicidade Ximenes
Editór : Cancio Ximenes
