DILI, 11 Fevereiru 2026 (TATOLI)–Tribunál Judisiál Primeira Instánsia Dili (TJPID), Kuarta ne’e, kontinua realiza julgamentu ba kazu pekulatu ne’ebé envolve husi membru na’in-tolu Polísia Nasionál Timor-Leste (PNTL) ho insiál DM, LL no BDS.
Arguidu DM no LL nu’udar membru PNTL baibain, enkuantu arguidu BDS nu’udar Diretór Lojístika Komandu Jerál PNTL desde tinan 2014.
Iha ajenda julgamentu, Tribunál ajenda ona atu rona depoimentu husi sasin Longuinhos Monteiro bazeia ba rekerimentu arguidu BSD.
Arguidu BDS solisita ba Tribunál katak presiza arolla deklarasaun husi sasin Longuinhos Monteiro nian iha prosesu ne’e, tanba momentu ne’ebá nia mak nu’udar Komandante Jerál PNTL no hatene prosesu ne’e ho kle’an.
Tanba ne’e, arguidu BSD konsidera katak sasin Longuinhos Monteiro nia depoimentu iha julgamentu ida-ne’e importante no konsidera hanesan deklarasaun xave iha prosesu ne’e.
Iha julgamentu anteriór, sasin auzente tanba razaun moras, nune’e Tribunál entende katak momentu ne’ebá sasin moras duni mak labele marka prezensa iha julgamentu.
Nune’e, Tribunál notifika sasin Longuinhos Monteiro atu fó nia deklarasaun ba kazu pekulatu. Maibé iha audiénsia julgamentu ne’e sasin fó nia depoimentu eskritu hodi aprezenta iha Tribunál kona-ba kazu ne’e.
Notísia relevante : Tribunál liberta arguidu BMF ne’ebé prodús kupon SDSB falsu husi sela detensaun PNTL
Maibé iha julgamentu ne’e, Tribunál koletivu la konsidera sasin nia depoimentu eskritu no hakarak sasin nia depoimentu direta.
Juiza Ercila de Jesus ne’ebé prezide koletivu husu ba sasin Longuinhos Monteiro atu marka prezensa iha Tribunál, tanba daudaun sasin iha kondisaun di’ak.
Juiza Ercilia argumenta, Tribunál entende karik sasin nia kondisaun moras, maibé bainhira ho kondisaun saúde di’ak ona bele mai fó nia depoimentu iha Tribunál tanba sasin no arguidu BDS rasik mak aprezenta ba Tribunál hodi rona nia deklarasaun.
Nia fundamenta, iha julgamentu anteriór ne’e sasin la marka prezensa ne’e iha justifikasaun ba Tribunál katak nia moras, maibé ba julgamentu ida ohin ne’e nia laiha justifikasaun ba Tribunál.
Tribunál notifika tan sasin Longuinhos Monteiro hodi mai hodi hato’o nia depoimentu, karik notifikasauun ne’e mak sasin la kumpre mak Tribunál sei hasai mandadu detensaun ba sasin.
“Ne’e ba dala-rua ona sasin la marka prezensa iha Tribunál, kuandu notifikasauun ne’e ba tan mak sasin la mai ne’e Tribunál sei hasai mandadu detensaun,” Juiza Ercila deklara iha sala audiénsia julgamentu.
Hafoin Tribunál halo deklarasaun ba prosesu referida, Juiz Ercila halo adiamentu ba prosesu ne’e ba loron 11 Marsu 2026 tuku 11:30 hodi kontinua rona depoimentu sasin Longuinhos Monteiro ba kazu ne’e.
Akuzasaun
Tuir faktu ne’ebé arrolla husi Ministériu Públiku (MP) katak kazu ne’e akontese iha Outubru 2014, bainhira arguidu BDS nu’udar Diretór Lojístika iha Komandu Jerál PNTL, ne’ebé jere kupon mina atu enxe ba karreta PNTL hodi halo serbisu.
Maibé iha momentu ne’e, arguidu BDS foti kupon ho ulun hitu hodi orienta nia membru na’in-rua hodi ba fa’an fali kupon mina ne’e ba ema seluk, nune’e arguidu na’in-tolu fahe malu.
Arguidu sira hatene katak hahalok ne’ebé sira halo ne’e krime no fó prejuizu ba Estadu, maibé sira kontinua halo atus ne’e. Nune’e, haree ba arguidu sira-nia hahalok ne’e, MP konstitui sira ba arguidu krime pekulatu, tanba uza sasan Estadu hodi benefisia fali ba sira-nia an.
Audiénsia julgamentu ne’e prezide hosi Juiz koletivu Juiza Ercilia de Jesus, Ana Paula Fonseca, José Maria de Araujo, MP reprezenta husi Prokuradora Lídia Soares, Arguidu BDS hetan asisténsia legál husi advogadu privadu Arlindo Sanches no Arguidu DM hetan asisténsia legál husi Defensora Públika Joana Cristina Pinto.
Jornalista : Natalino Costa
Editora : Julia Chatarina
