DILI, 11 Fevereiru 2026 (TATOLI)—Prokuradór Jerál Repúblika, Nelson de Carvalho, informa, Prokuradór Titulár ne’ebé kaer prosesu kona-ba kazu scam no jogu online iha Oekusi, Zita Plaza no Dragon kontinua halo investigasaun.
“Ita-boot sira hatene iha kazu online Dragon no Oekusi ninian ne’e, prosesu ne’e iha investigasaun nia laran, ida Oekusi ne’e arguidu balun iha hela Prizaun Preventiva, kona-ba Dragon nian mós hala’o investigasaun ba ida-ne’e,” Prokuradór Nelson de Carvalho hato’o ba Ajénsia TATOLI iha ninia knaar fatin, Kolmera, Kuarta ne’e.
Notísia relevante : Tribunál aplika medida koasaun tolu ba arguidu na’in-10 suspeitu ba jogu online
Nia dehan, investigsaun ba kazu iha Oekusi ne’e presiza tempu tanba Prizaun Preventiva ne’e másimu ne’e tinan-ida.
“Entaun tres meses, seis mezes, sira (Prokuradór) sei husu estensaun hodi hanaruk tan hodi husu ba Tribunál kuandu prosesu investigasaun seidauk termina, kuandu termina Ministériu Públiku prepara akuzasaun,” nia katak.
Jornalista : Natalino Costa
Editora : Julia Chatarina
