DILI, 12 Fevereiru 2026 (TATOLI)- Ministériu Komérsiu no Indústria (MKI) lansa fatuk dahuluk ba konstrusaun Merkadu Modernu Munisipál Baukau, ne’ebé lokaliza iha Vila Nova.
Serimónia lansamentu ne’e hala’o husi Vise-Primeiru-Ministru, Mariano ‘Assanami’ Sabino, no akompaña husi Ministru Komérsiu no Indústria, Filipus Nino Pereira, no membru Governu sira seluk.
Nino Pereira hateten katak merkadu foun ida-ne’e hanesan oportunidade di’ak ba komunidade Baukau tomak iha futuru hodi halo negósiu. Tanba ne’e, foti tema “Merkadu Foun, Oportunidade Foun ba Dezenvolvimentu Ekonomia Lokál” iha lansamentu ida-ne’e.
“Merkadu ida-ne’e sei fasilita ita-nia vendedór sira hodi hala’o atividade atu kontribui ba dezenvolvimentu ekonomia lokál”, Filipus Nino Pereira hateten.
Tuti nia, ko’alia kona-ba ekonomia atu la’o hahú husi vendedór sira, setór privadu sira, nune’e presiza merkadu ne’ebé dignu ba sira hala’o atividade ekonómika. “Ida-ne’e mak daudaun Governu kontinua halo esforsu hodi apoiu ekonomia lokál liuhusi hadi’a merkadu, estrada no seluk tan.
Liuhusi merkadu ne’e, governante dehan sei halo atividade negósiu hodi promove produtu lokál tanba Baukau iha potensialidade ida-ne’ebé kontribui ba produtu barak iha Timor-Leste.
Assanami mós agradese ba povu Baukau tomak ne’ebé pasiensia durante tinan barak nia laran hein merkadu foun no ikusmai konsege lansa ona fatuk dahuluk ba konstrusaun fatin ne’e rasik.
“Kompromisu Governu nian oinsá harii fatin dignu ba nia povu ka vendedór sira, hodi hala’o atividade negósiu, tanba ko’alia kona-ba dezenvolvimentu ekonomia mai husi povu, liuliu vendedór sira”, Assanami hateten.
Prezidente Autoridade Munisípiu Baukau, Veneranda Lemos Martins, dehan komunidade tomak Baukau hein tempu naruk, maibé ohin marka tan istória foun ba munisípiu Baukau ne’ebé lansa konstrusaun Merkadu Munisipál, ne’ebé sei fasilita vendedór sira atu hetan fatin di’ak hodi hala’o negósiu.
Nia salienta katak Baukau durante ne’e seidauk iha merkadu própriu ba vendedór sira hala’o atividade. Merkadu ne’ebé komunidade uza durante ne’e maihusi Portugés nia tempu ne’ebé halo iha tinan 1932.
“Agora Governu harii ona merkadu ida-ne’e, sei apoiu tebes vendedór sira hodi kontribui ba dezenvolvimentu ekonomia nasaun, tanba pilár fundamentál ba ekonomia nasaun nian hahú husi povu”, afirma.
Nia parte husu ba empreza konstrutora atu ba oin serbisu hodi garante kualidade obra no finaliza lalais tuir kontratu, nune’e fasilita vendedór sira.
Diretór empreza Suhurama Developer Unipessoal Lda., Ricardo Cardoso, hateten konstrusaun merkadu ne’ebé sira halo sei fasilita kedas ho eletrisidade, bee-moos no fatin estasionamentu, salaun no seluk tan.
Nia dehan konstrusaun referida kaer husi empreza rua mak Fujian Yongtai Construction Group.Co, Ltd., joint venture ho Suhurama Developer Unipessoal Lda., ho totál orsamentu tokon $7-resin no durasaun konstrusaun tinan rua.
“Ohin lansa ona fatuk dahuluk, sura hahú husi ohin ami sei halo esforsu hodi termina tuir tempu ne’ebé iha”, nia garante.
Lembra katak, iha loron 06 Fevereiru, MKI mós lansa ona fatuk dahuluk ba konstrusaun Merkadu Modernu Munisipál Ermera, ne’ebé responsabiliza husi empreza Henan Fifth Construction Group Co.,Ltd., husi Xina, ho totál orsamentu $8.861.517,89 no durasaun tempu tinan ida ho balun ka fulan 19.
Notísia relevante: Governu reforsa ekonomia lokál ho lansamentu fatuk ba Merkadu Munisipál Ermera
Jornalista: Arminda Fonseca
Editora: Maria Auxiliadora
