OEKUSI, 12 Fevereiru 2026 (TATOLI) – Membru Parlamentu Nasionál (PN) komisaun A trata asuntu kona-ba konstituisaun no justisa, kinta ne’e, hala’o audiénsia ho membru Autoridade Rejiaun Administrativa Espesiál Oekusi Ambeno (RAEOA) atu fiskaliza dezempeñu serbisu no aktu administrativu RAEOA nian.
“Ami mai iha ne’e tuir kompeténsia konstituisaun artigu 95.o, ne’ebé fó kompeténsia ba PN atu halo fiskalizasaun ba polítika no aktu administrativu Governu nian no mós rejimentu artigu 35.o fó kompeténsia ba deputadu atu hala’o sira-nia kna’ar liu-liu atu haree aktu Governu implementasaun programa no fiskalizasaun,” Prezidente Komisaun A, Natalino dos Santos informa ba jornalista sira iha Oekusi, ohin.
Notísia relevante:Governu hahú avalia kondisaun mínima ba instituisaun Estadu sira iha Oekusi
Membru órgaun lejislativu ne’e haktuir, iha audénsia ofisiál ne’e, deputadu sira mós rona preokupasaun, ne’ebé aprezenta husi diretór sira hodi rekomenda ba Governu atu konsidera.
“Entaun ohin mai iha Oekusi audiénsia ho Autoridade RAEOA, atu haree progresu dezenvolvimentu, rona mós sira-nia problema dezafiu ba sira-nia dezempeñu serbisu hanesan ajente Estadu atu serbí povu, administrativamente, saida mak presiza atu rona husi sira, no deputadu artikula ho sira, nune’e bele hala’o serbisu dezempeñu hanesan ajente Estadu. Ne’ebé, iha audénsia ne’e, diretór Diresaun Rejionál sira iha Oekusi, destaka buat barak, presiza deputada sira toma nota atu hato’o ba Governu Sentrál,” nia afirma.
Reprezentante povu iha uma Fukun Parlamentu Nasionál (PN) ne’e esplika, Komisaun Ajenda mó sei audénsia ho Provedória Direitu Humanu no Justisa (PDHJ), Diresaun Rejionál Terra Propriedade no Diresaun Rejistu Sivíl Notariadu Oekusi, atu observa fasilidade no avaliasaun dezempeñu administrasaun nian iha Oekusi.
Nune’e, mós sei hala’o reuniaun ho parte CNE no STAE kona-ba tratamentu kartaun eleitorál ho sistema biometriku, inklui hala’o reuniaun ho instituisaun judisiáriu sira hanesan Tribunál Judisiáriu Primeira Instánsia Oekusi, Defensória Públika no Ministériu Públiku.
Notísia relevante:Ekipa avaliadora deskobre pontu prinsipál haat iha Oekusi nesesáriu presiza hadi’a
Iha biban ne’e, Diretór Diresaun Rejionál Administrasaun, José Tanesib Anunu, reprezenta Prezidente Autoridade RAEOA, konsidera fiskalizasaun ne’e importante, nune’e ba futuru bele hadi’a di’akliu tan progresu serbisu iha Oekusi.
“Ohin sira mai, atu bele hatene progresu serbisu no difikuldade saida mak durante ne’e enfrenta iha Oekusi, tanba ne’e hanesan sira-nia kompeténsia atu buka hatene, entaun ita agradese tanba liuliu husi fiskalizasaun ita bele hato’o preokupasaun sira, hanesan ezekutivu oinsá bele hala’o serbisu no mós ezekuta Orsamentu Jerál Estadu ne’e ho loloos, ohin sira husi dehan ita bele ezekuta kala’e, ne’ebé ita responde ho pozitiva katak, RAEOA prontu atu ezekuta ho responsabilidade,” nia afirma.
Notísia relevante:Komisaun A hakarak fiskaliza funsionamentu administrasaun iha munisípiu lima
Lembra katak, iha 29 Dezembru 2025, Governu sentrál liuhusi Ministériu Administrasaun Estatál (MAE) hamutuk ho Prezidente Autoridade Munisípiu sira hotu halo reuniaun hodi aprezenta relatóriu prelimináriu ba avaliasaun kondisaun mínima munisípiu sira. Nune’e iha munisípiu lima mak hetan valór muito bom no hitu hetan bom.
Relatóriu ne’e sei aprezenta ba Konsellu Ministru mak sei pronúnsia munisípiu lima ne’e nia naran.
Jornalista: Abílio Elo Nini
Editór: Rafael Ximenes de A. Belo
