DILI, 04 Fevereiru 2026 (TATOLI)-Komisaun A iha Parlamentu Nasionál, ne’ebé Trata Asuntu Konstitusionál no Justisa hakarak halo fiskalizasaun bá munisípiu lima ne’ebé tuir avaliasaun husi Governu sentrál nian hetan muito bom.
Fiskalizasaun ne’e sei hahú iha loron 05 Fevereiru, iha Manufahi, hodi haree preparativu sira, liuliu funsionamentu administrasaun iha baze atu simu desentralizasaun administrativa no podér lokál husi Governu sentrál.
Prezidente Komisaun A, Natalino dos Santos, hateten Komisaun tau ona ajenda atu halo fiskalizasaun ba munisípiu, ne’ebé hahú husi Manufahi hodi bele rona hanoin no preparasaun husi autoridade munisípiu atu inteira no akompaña.
“Vizita ne’e oinsá haree funsionamentu administrasaun. Ne’e devér Komisaun nian ne’ebé haree kona-ba asuntu ne’e bainhira [hakat] bá desentralizasaun administrativa no podér lokál”, nia hateten hafoin ramata sorumutu Komisaun iha Parlamentu, ohin.
Komisaun sei hasoru ho entidade husi Diresaun Terra no Propriedade, Serbisu Rejistu Notariadu, Provedoria Direitu Umanu no Justisa (PDHJ, sigla portugés) no observa mós sira-nia avaliasaun dezempeñu administrasaun iha munisípiu.
Vizita mós Komisaun Nasionál Eleisaun (CNE, sigla portugés) no Sekretariadu Tékniku Administrasaun Eleitorál (STAE) hodi haree preparativu ba eleisaun kámara no asembleia munisipál rasik.
Lembra katak, iha 29 Dezembru 2025, Governu sentrál liuhusi Ministériu Administrasaun Estatál (MAE) hamutuk ho Prezidente Autoridade Munisípiu sira hotu halo reuniaun hodi aprezenta relatóriu prelimináriu ba avaliasaun kondisaun mínima munisípiu sira. Nune’e iha munisípiu lima mak hetan valór minuto bom no hitu hetan bom.
Relatóriu ne’e sei aprezenta ba Konsellu Ministru mak sei pronúnsia munisípiu lima ne’e nia naran.
Notísia relevante: Relatóriu avaliasaun indika munisípiu lima hetan ‘muito bom’
Jornalista: Nelson de Sousa
Editora: Maria Auxiliadora
