DILI, 12 Fevereiru 2026 (TATOLI)-Komisaun G iha Parlamentu Nasionál ne’ebé trata Asuntu Edukasaun, Juventude, Despostu, Kultura no Sidadania hahú diskute proposta lei númeru 24/VI (3a) Rejime Jurídiku Prátika Arte Marsiál.
Prezidente Komisaun G, Armando Lopes, hateten Komisaun hahú halo introdusaun prévia ba proposta lei ne’e ba deputadu sira husi parte asesória legál antes tama ba halo audiénsia públika.
Nia esplika katak proposta lei ne’e atu revoga lei númeru 5/2017 kona-ba Rejime Jurídiku Prátika Arte Marsiál, Rituál, Arma Branka no Rama Ambon. Maibé la’ós atu revoga totalmente, ba de’it artigu pur volta hitu husi lei vijente ne’ebé haree katak laiha nesesidade ona presiza revoga.
“Maibé orsida iha diskusaun bele iha mudansa depende ba parte Governu no deputadu sira”, nia hateten hafoin ramata sorumutu Komisaun iha Parlamentu, ohin.
Prezidente Komisaun ne’e seida’uk esplika detalla konteúdu ba artigu sira ne’e tanba sei halo uluk apresiasaun inisiál hafoin aprezenta relatóriu no pareser.
Tuir ajenda, fulan ne’e nia laran komisaun sei halo audiénsia públika ba proposta lei ne’e ho autór inisiativa lei ho Governu liuhusi Ministériu Interiór (MI) no Ministériu Juventude, Desportu, Arte no Kultura (MJDAK).
Sei konvida mós Komisaun Reguladora Arte Marsiál (KRAM), organizasaun arte marsiál sira no sosiedade sívil hodi rona hanoin, nune’e bele prodús lei ida di’ak fó solusaun ba preokupasaun ne’ebé sosiedade hasoru.
Lembra katak, iha tinan kotuk, Governu liuhusi reuniaun Konsellu Ministru aprova proposta Lei Rejime Jurídiku Prátika Arte Marsiál ne’ebé aprezenta husi Ministru Interiór, Francisco da Costa Guterres.
Objetivu husi inisiativa lejizlativa ne’e atu estebelese rejime jurídiku ida ne’ebé klaru ba ensinu aprendizajen no prátika arte marsiál iha Timor-Leste, hodi asegura katak atividade ne’e hala’o ho seguru, ordenadu no tuir prinsípiu orden públiku nian.
Iha 10 Dezembru 2025 Governu liuhusi reuniaun Konsellu Ministru kontinua suspende prátika arte marsiál to’o Juñu 2026.
Notísia relevante: Prátika arte marsiál suspende to’o Juñu 2026
Jornalista: Nelson de Sousa
Editora: Maria Auxiliadora
