DILI, 10 Dezembru 2025 (TATOLI) – Governu hanaruk, to’o loron 30 fulan-Juñu 2026, suspensaun ba ensinu, aprendizajen no prátika arte marsiál no taka temporáriu ba fatin no instalasaun hotu-hotu ne’ebe destinadu ba ensinu, aprendizajen no prátika arte marsiál.
Desizaun ne’e Konsellu Ministru halo hodi fó kontinuasaun ba Rezolusaun Governu n. 45/2023, loron 10 fulan-Novembru, ne’ebé extende ona tuituir malu husi Rezolusaun Governu n. 17/2024, loron 24 fulan-Abríl, n. 60/2024, loron 7 fulan-Novembru, no n. 22/2025, loron 7 fulan-Abríl.
“Presupostu sira ne’ebé justifika suspensaun ne’e vigora nafatin, liuliu nesesidade atu hametin dame sosiál ne’ebé hetan ona dezde fulan-Novembru 2023 no atu garante katak prátika arte marsiál sei bele halo de’it iha kontestu desportivu, hodi kontribui ba formasaun sívika no umanista ba joven sira”, hatuir komunikadu husi Governu ne’ebé Tatoli asesu, ohin.
Lembra katak Governu foin lalais ne’e konklui prosedimentu lejizlativu hodi submete ba Parlamentu Nasionál proposta lei ida ne’ebé sei estabelese rejime jurídiku foun ba prátika arte marsiál.
“To’o nia aprovasaun no tama iha vigór, nafatin nesesáriu kontinuasaun ba suspensaun no enserramentu temporáriu ba fatin sira ne’ebé destinadu ba ensinu, aprendizajen no prátika arte marsiál”, dehan.
Notísia relevante: Governu kontinua suspende prátika arte marsiál to’o Dezembru
Jornalista: Alexandra da Costa
Editór: Cancio Ximenes
