DILI, 12 Fevereiru 2026 (TATOLI)–Primeiru-Ministru, Kay Rala Xanana Gusmão, orienta Vise-Ministra Finansa Foun Regina de Jesus atu serbisu ho fuan, kakutak no responsabilidade hodi hadi’a sistema finanseiru iha Timor-Leste.
Notísia Relevante: Aban, Prezidente Ramos-Horta sei fó pose ba Vise-Ministra Finansa Regina de Jesus
Iha orientasaun, Xanana husu mós ba Ministra Finansa Santina Cardoso atu koordena serbisu di’ak ho Vise-Ministra Regina de Jesus atu serbisu hotu bele la’o ho di’ak liuliu sistema finanseiru iha Timor-Leste.
“Vise-Ministra Finansa foun, ohin simu ona pose husi Prezidente Repúblika, nia ha’u koinese kleur ona, antes ne’e nia Diretora Jerál Tezoru, kompetente, responsavel,” Xanana hateten ba jornalista sira hafoin ramata pose ne’ebé hala’o iha Palásiu Prezidensiál, Nicolau Lobato Dili, kinta ne’e.
Nia dehan, iha esperansa ba Vise-Ministra Regina de Jesus atu serbisu hamutuk ho Ministra Santina Cardoso hodi hadi’a sistema finanseiru ne’ebé Governu anteriór kria.
“Sira feto na’in-rua (2) ne’e mak sei serbisu hodi hadi’a ita-nia sistema finanseiru iha Timor-Leste. Vise serbisu ho di’ak, Ministra serbisu ho di’ak, koordena ba malu, fó serbisu ba malu para hadi’a, atu nune’e hotu ita-nia mandatu, sistema finanseiru sei la’o ho di’ak. Fó atensaun ba malu sira-ne’ebé kaer sistema finansa iha munisípiu tanba ita atu tama ba desentralizasaun. Parabéns, serbisu di’ak, ami-nia konfiansa iha imi na’in-rua (2),” Xanana Gusmão hateten direita ba Vise-Ministra Rgina no Ministra Santina.
Xefe Governu hatutan, nomeia Regina substitui Vise-Ministra anteriór Felícia Carvalho tanba durante fulan ida (1) ko’alia ho nia Felícia maibé la koi atu asume tan kargu referidu.
“Durante fulan ida (1), ha’u ko’alia ho Felícia maibé la konsege, nia dehan labele mak husu demisaun,” Xanana dehan.
Antes ne’e, Regina de Jesus asumi kna’ar hanesan Diretora Jerál Tezouru iha Ministériu Finansa.
Jornalista : Hortencio Sanchez
Editór : Cancio Ximenes
