DILI, 13 Fevereiru 2026 (TATOLI)—Dirasaun Nasionál Transporte Terrestre (DNTT), iha Janeiru 2026 ne’e, rekolla reseita hamutuk millaun $1-resin husi atividade 10 ne’ebé implementa durante ne’e.
“Reseita ne’ebé DNTT rekolla iha fulan-Janeiru hamutuk $1.807.21700,00 ne’ebé kompostu husi infrasaun rekolla $1.171,00, rejistu veíkulu $277.181,00, aprova importasaun no inspesaun hamutuk $227.041,00, taxa administrativa tetu sasán tama iha Mota-ain $24.220,00, xapa espesiál $6000,00, transporte públiku $23.375,00, karta kondusaun $58.930,00, inspesaun veíkulu $219.470,00, DSPL (surat jalan) hamutuk $18.100.00 no DSPLOV (rai emprime STNK ba banku) rekolla $630.00,” Xefe seksaunne’e informa ba Agência Tatoli iha nia kna’ar fatin Balide, ohin.
Maibé, nia dehan, ida kona-ba fronteira ne’e rekolla de’it husi Mota-ain Batugade, Mota-Masin Suai nian ne’e DNTT seidauk iha tanba sei iha prosesu manutensaun no iha fulan-Marsu mak sei kontinua hahú fali operasaun servisu.
Nia dehan reseita hirak ne’e kuazé sira rekolla loro-loron tanba sidadaun barak mak mai trata dokumentu veíkulu nian, tantu transporte públiku no privadu, entaun ida-ne’e kontribui mós ba kofre Estadu.
“Reseita tinan kotuk ita rekolla kuaze millaun $7-resin kompara ho administrasaun direta sira seluk ne’ebé tutela ba Ministériu Transporte Komunikasaun,” nia dehan.
Jornalista : Alexandra da Costa
Editór : Cancio Ximenes
