DILI, 13 Fevereiru 2026 (TATOLI)-Komisaun A iha Parlamentu Nasionál ne’ebé trata Asuntu Konstitusionál no Justisa prepara ona projetu Lei Orden Advogadu, ne’ebé kaduka, no sei submete ba meza Parlamentu Nasionál atu halo diskusaun.
Prezidente Komisaun A, Natalino dos Santos, dehan projetu lei ne’e, iha lejislatura liubá halo ona diskusaun iha faze espesialidade, maibé la konsege kontinua diskusaun no aprovasaun iha finál globál iha plenária, nune’e kaduka tiha.
Tanba ne’e, Komisaun haree katak lejislasaun ne’e importante tebes haree ba problema iha setór justisa, ho ida-ne’e deputadu sira subskreve filafali hodi aprezenta projetu lei ne’e
“Deputadu sira haree prinsipál bele avansa fali lei hodi regulariza advogadu profisionál sira tantu nasionál no internasionál ne’ebé mai prátika iha ne’e”, nia hateten.
Deputadu sira mós iha kompeténsia ne’ebé Konstituisaun fó hodi aprezenta projetu lei no ida-ne’e hein artikulasaun no konsertasaun ho Governu.
Lembra katak, iha 04 Maiu 2021, Parlamentu Nasionál liuhusi reunian plenária aprova proposta-lei númeru 26/V/3ª, kona-ba Orden ba Advogadu sira iha faze jeneralidade.
Konteúdu husi proposta lei ne’e kona-ba regulasaun asesu no ezersísiu iha profisaun advogadu sira, inskrisaun no emisaun korrespondente sédula profisionál, ne’ebé asegura husi Ministériu Justisa (MJ), liuhusi Konsellu ba Jestaun no Disiplina iha Advokasia.
Proposta lei ne’e komposta husi artigu hamutuk ualu, anexu ida, kapítulu hamutuk sia, kontein ho artigu hamutuk 101.
Anexu ne’e komposta husi kapítulu I kona-ba dispozisaun jerál ho artigu hamutuk 10, kapítulu II kona-ba Órgaun Orden Advogadu Timor-Leste (OATL) iha sesaun I (dispozisaun jerál) ho artigu hamutuk 10, sesaun II (asembleia jerál) ho artigu neen, sesaun III (bastonáriu) ho artigu hamutuk rua, sesaun IV (diresaun) ho artigu hamutuk rua, sesaun V (konsellu jurizdisionál no fiskál) ho artigu rua.
Kapítulu III kona-ba ezersísiu advokasia iha sesaun I (dispozisaun jerál) ho artigu 15, sesaun II (inkompatibilidade no impedimentu sira) ho artigu haat.
Kapítulu IV kona-ba deontolojia iha sesaun I (prinsípiu jerál) ho artigu hamutuk neen, sesaun II (relasaun ho kliente) ho artigu hamutuk lima, sesaun III (relasaun ho tribunál) ho artigu hamutuk tolu, sesaun IV (relasaun entre advogadu sira) ho artigu tolu.
Iha kapítulu V kona-ba disiplina iha artigu hamutuk 10, kapítulu VI kona-ba rejime patrimoniál ho artigu rua, kapítulu VII kona-ba kooperasaun institusionál iha artigu ida de’it.
Nune’e mós kapítulu VIII kona-ba adgovadu no advogadu estajiáriu iha sesaun I (inskrisaun OATL) iha artigu haat, sesaun II (inskrisaun atu sai advogadu) iha artigu haat, sesaun III (estájiiu no inskrisaun atu sai advogadu estajiáriu) iha artigu hitu.
Kapítulu IX kona-ba dispozisaun finál iha sesaun I (responsabilidade kriminál no sivíl) iha artigu tolu no sesaun II (dispozisaun sira seluk) iha artigu rua.
Notísia relevante: Komisaun A fó prioridade ba diskusaun Lei Orden Advogadu
Jornalista: Nelson de Sousa
Editora: Maria Auxiliadora
