DILI, 13 Fevereiru 2026 (TATOLI)—Komisaun B ne’ebé trata asuntu Negósiu Estranjeiru, Defeza no Seguransa liuhusi fiskalizasaun, deteta katak mosu irregularidade balun iha prosesu rekrutamentu membru foun Polísia Nasionál Timor-Leste (PNTL).
“Ein prinsípiu Komisaun B ninia pozisaun rekoñese katak irregularidade ne’e iha (irregularidade), maibé bazeia ba nesesidade Komandu PNTL, liliu preokupasaun kona-ba menus rekursu umanu iha instituisaun, Komisaun B nia pozisaun antes kedas katak ita anula para depois lakon tempu tan, entaun di’ak liu ita suspende para parte hotu bele kontribui ba hadi’a irregularidade sira ka fallansu sira ne’ebé kontinua nafatin prosesu ne’e, para depois bele hetan rekrutamentu ba ita-nia membru sira,” Prezidente Komisaun B, Domingos Agostu ‘Deker’ hato’o ba Jornalista sira hafoin enkontru ho Komandante Jerál PNTL, Komisáriu Jerál Polísia Henrique da Costa no Prezidente Komisaun Rekrutamentu, Komisáriu Pedro Belo, iha Komandu Jerál PNTL, Kaikoli Sesta ne’e.
Notísia relevante: Komisaun Rekrutamentu PNTL rejista aplikante na’in-400 hato’o rekursu ba MI
Komisaun B nia prezensa iha Komandu Jerál PNTL hakarak rekomenda atu evita familiarizmu no favoritizmu atu garante transparánsia ba sidadaun hotu.
Deputadu ne’e haktuir, Komisaun B hola parte iha momentu rekrutamentu nu’udar supervizaun ida, maski hatene katak iha irregularidade. Momentu ne’ebá la halo intervensaun maibé fó rekomendasaun atu Komisaun Rekrutamentu bele kaer prinsípiu separasaun poder.
“Deputadu ida asume responsabilidade ida, halo supervizasun labele ba tau kanuru tohar tama iha laran fali. Públiku presiza hatene sasán sira ne’e, la’ós campur aduk. Respeita no hakruk ba separasaun poder. Komisaun B no parte seluk, tanba ne’e halo supervizasun de’it, halo akompañamentu de’it, desizaun ne’e kompete ba Komisaun Rekrutamentu,” nia akresenta.
Komisaun B daudaun halo fiskalizasaun daruak, ohin Komandu Jerál sei bá Komisaun Rekrutamentu nune’e bele hatene iha iregularidade sira.
“Komisaun B nian kestaun asume responsabilidade mak tenke halo fiskalizaun, depois husi ne’e mak identifika buat ruma ami sei hato’o liuhusi ami-nia relatóriu,” Deputadu Deker, katak.
Komisaun seidauk relata buat ruma tanba asuntu defeza no seguransa konsideradu sensitivu.
“Iha buat balun ne’ebé bele ko’alia ba públiku iha buat balun ne’ebé barak ami la ko’alia ba públiku. Kuandu iha irregularidade ne’e ami tenke kontribui liuhusi ami-nia rekomendasaun ba Komandu PNTL, liuliu ba Komisaun Rekrutamentu no Ministériu Interiór atu tau konsiderasaun, tanba sidadaun nia posizaun mak hetan direitu atu hetan asesu ba rekrutamentu no presiza Komandu PNTL nia prezensa ho espíritu,” nia katak.
Deputadu ne’e konsidera informasaun ne’ebé fó sai dehan Deputadu balun rekomenda nia oan ne’e presiza konfirma fali.
“Hanesan reprezentante povu hakruk no respeitu nafatin prinsípiu separasaun poder, hanesan órgaun polítiku, hala’o ami-nia fiskalizaun para kontribui liuhusi ami-nia relatóriu. Komisaun B seidauk realsa buat ruma ne’ebé publika iha mídia, ami seidauk konsidera ne’e faktus, enkuantu ami seidauk kaer evidénsia iha liman ne’e seidauk bele loos,” nia afirma.
Iha fatin hanesan, Komandu Jerál PNTL, Komisáriu Jerál Polísia Henrique da Costa, hateten, durante enkontru, Komisaun B husu atu tau atensaun ba prosesu sira, tenke transparánsia.
“Tanba rekrutamentu ida-ne’e ema preukupa mak familiarizmu hodi nune’e tau iha prátika hodi hahú prosesu ne’ebé justu. Ita iha tempu loron 20 hodi serbisu hamutuk hodi haree kona-ba ida-ne’e,” nia katak.
Komandante jerál PNTL Komisáriu Jerál Polísia Henrique da Costa Guterres garante katak prosesu sira ne’ebé mai ne’e sei la’o ho trasnparánsia.
“Ida-ne’e mak ema hotu hakarak, la’ós dehan Komandu mesak mas ida-ne’e hotu-hotu hakarak, ida implementa prosesu ida ne’ebé transparánsia no nakloke ba ema hotu atu nune’e ema hotu iha oportunidade hanesan,” nia tenik.
Komisáriu Henrique hateten, Komandante Jerál laiha kompeténsia atu nomea nia membru ida tuir iha Komisaun ne’ebé Governu forma, tanba kompete ba Ministru Interiór.
Jornalista : Natalino Costa
Editora : Julia Chatarina
