DILI, 13 Fevereiru 2026 (TATOLI)—Ministru Obra Públika, Samuel Marçal, klarifika ponte provizóriu ne’e la presiza atu haree ka halo estudu viabilidade, tanba ponte provióriu ne’e harii atu provizoriumente fasilita movimentasaun no hamenus tráfegu bainhira emperza iha hela prosesu konstrusaun permante ba ponte foun Meufelu-Beckora nian.
Notísia Relevante: Governu hahú sobu ponte Maufelu atu konstrui fali ponte foun
“Ponte provizóriu ne’e la’ós buat ida-ne’é ita tenke kestiona. Ponte provizóriu ka temporária ne’e fasilita movimentasaun de’it. Ponte provizóriu ne’e ita halo la haree ba presaun bee nian no ida-ne’e la presiza atu haree mós hanesan estudu viabilidade. Bainhira presaun mota tuun mai naksobu, laiha buat ida, tanba horsehik ita bele halo hotu fali kedas,” Ministru Samuel hateten ba Agência Tatoli liuhusi telefónika, ohin.
Governante ne’e dehan, tuir loloos públiku labele kestiona kona-ba ida ne’e tanba ida-ne’e ponte provizóriu ne’e lori prosesu naruk hodi hein ponte permanente ne’e ninia konstrusaun konlui.
“Enkuantu ponte permanente ne’e mak konklui ona ita sei sobu fali ponte provizóriu rua ne’ebé daudaun ne’e fasilita hela movimentasaun ba-mai iha diresaun Bekora ho Kuluhun,” nia informa.
Konstrusaun ponte provizóriu ne’e, Governu lahasai osan ba obra ida-ne’e tanba ne’e servisu pakote mobilizasaun ida husi empreza nian, entaun ne’e mekanizmu husi empreza nian tanba regra Governu nian ne’e halo kontratu ba konstrusaun ponte permanente ne’e de’it.
Entretantu, hafoin ponte provizóriu hetan sobu husi bee-mota ho volume boot mak iha 11 Fevereiru 2026 ne’e, Governu no empreza tuun ba terrenu hodi hadi’a kedas no daudaun ne’e movimentasaun transporte públiku no privadu, no movimentasaun ema la’o hanesan baibain.
Jornalista : Alexandra da Costa
Editór : Cancio Ximenes
