OEKUSI, 12 Fevereiru 2026 (TATOLI) – Ekipa Provedória Direitu Umanu no Justisa (PDHJ) Delegasaun Territoriál, Rejiaun Administrativa Espesiál Oekusi Ambeno (RAEOA), kinta ne’e, hala’o audiénsia ho Membru Parlamentu Nasionál (PN) husi Komisaun A trata asuntu kona-ba konstituisaun no justisa, iha edifísiu PDHJ Oekusi.
Diretór PDHJ Oekusi, Bartolomeu Gonçalves, iha audiénsia ne’e, aprezenta preokupasaun haat ba komisaun A, liga ba rekursu umanu no infraestrutura ba edif’isiu PDHJ Oekusi.
Notísia relevante:PDHJ Oekusi rejista keixa sia ho indikasaun forte iha violasaun rua
Preokupasaun haat ne’ebé PDHJ aprezenta primeiru kona-ba númeru funsionáriu destaka iha PDHJ Oekusi provizória na’in-ualu de’it, tanba ne’e presiza aumenta rekursu umanu nune’e bele hala’o serbisu di’ak liutan atu hasoru podér lokál no dezentralizasaun ne’ebé sei akontese iha 2027.
Preokupasaun daruak kona-ba infraestrutura, tanba edifísiu PDHJ nia kondisaun sai vulneravel tebes, bainhira monitoriza ema nia direitu maibé intermus infraestrutura PDHJ nia edifísiu dezde uluk to’o agora, entaun presiza edifisíu foun.
Preokupasaun datoluk, presiza apoia seguransa sivíl atu garante seguransa ba patrimoniu Estadu iha edifisíu ne’e no ikusliu presiza morru protesaun, tanba fasíl tebes ema lao tama sai livre tuir edifisíu oin bainhira oras serbisu remata no tempu feriadu, maske dokumentu importante sira iha laran inklui patrimóniu Estadu sira.
“Ida-ne’e mak ami senti la seguru no preokupa tebes, tanba ne’e liuhusi fiskalizasaun ne’e, ami rekomenda ba deputadu sira Komisaun A, bele rona ami-nia difikuldade sira, bele informa liutan ba Governu, atu bele konsidera ba futuru tau atensaun,” nia hateten iha audiénsia ne’e.
Notísia relevante:PDHJ atualiza rezultadu fiskalizasaun no simu keixa ba dirijente Oekusi
Hafoin rona tiha preokupasaun hirak-ne’e, Prezidente Komisaun A, Natalino dos Santos, reponde kedas, katak Komisaun A rejista ne’e rekomenta ho komisáriu PDHJ nasionál hodi integra bai ha Planu Asaun Anuál (PAA) 2027 nian.
“Preokupasaun ne’e pertinente, Komisaun A rejista depois ita lori ba komisaun sei rekomenda ba instituisaun kompetente liu-liu PDHJ iha nasionál, ita sei ko’alia ho sira-nia komisáriu sira iha nasionál, atu haree oinsa iha previzaun orsamentu ba 2027 nian, atu haree asuntu ne’e tau prioridade, liu-liu edifisíu kleur ona dezde tempu okupasaun, rekursu umanu sai prioridade no laiha seguransa sivíl inklui morru protesaun, ne’e importante hotu tanba ezisténsia PDHJ iha nesesáriu ba povu Oekusi,” nia hateten.
Notísia relevante:PDHJ deteta funsionáriu barak iha Oekusi dezobidiente ba enkuadramentu legál
Jornalista: Abílio Elo Nini
Editór: Rafael Ximenes de A. Belo
