AINARU, 14 Fevereiru 2026 (TATOLI) – Governu lansa projetu reabilitasaun estrada urbana iha Ainaru Vila, munisípiu Ainaru, ho serimónia asinatura kontratu ne’ebé hala’o iha Administrasaun Munisipál Ainaru, sábadu ne’e (14/02/2026).
Inisiativa ne’e hanesan marka pasu importante ba dezenvolvimentu infraestrutura iha Munisípiu Ainaru, ne’ebé sei fó impaktu boot ba mobilidade, ekonomia lokal, no moris di’ak komunidade sira.
Kontratu ba projetu ne’e asina husi Ministru Obras Públika, Samuel Marçal, ho reprezentante sira husi kompañia konstrutora, Fortuna Star Unipessoal no Riqueza Gavinto Unipessosl, iha prezensa, Primeiru-Ministru, Kay Rala Xanana Gusmão, Prezidente Autoridade Munisípiu Ainaru, Manuela Georgina Carmo Bucar Corte Real, no komunidade lokál sira.
Projetu rehabilitasaun estrada urbana ne’e sei konstrui ho pakote rua ho durasaun tinan ida. Iha ne’ebé pakote dahuluk (I) ho distánsia 6.058,02 km ho númeru kontratu SSS/009/MOP-2026, no valór kontratu, $4,324.875,85 sei responsabiliza husi Fortuna Star Unipessoal, ho durasaun fulan neen, no pakote daruak (II) ho nia distánsia 6.193,25 km, ho númerui kontratu SSS/010/MOP-2026, ho valór kontratu 4,324.875,85, sei ezekuta husi Riqueza Gavinto Unipessosl durante fulan neen.
Intervindu iha eventu ne’e, Xanana Gusmão afirma katak rehabilitasaun estrada urbana ne’e hanesan meiu ida hodi atinji mehi eroi no saudozu sira nian no inklui ema hirak ne’ebé mate, tanba hakarak liberta rai ida ne’e.
Iha fatin hanesan, Samuel Marçal esplika ba tinan ida ne’e kompañia hahú uluk pakote rehabilitasaun ne’e ba estrada ho luan kuaze metru 15 ne’ebé inklui ona espasu ba drenajen, kanalizasaun be’e-mos no inklui espasu ba jardin.
Governante ne’e haktuir katak iha tinan ne’e kompañia sei hahu uluk pakote rua ne’e ho distánsia 12 km ho orsamentu kuaze milaun $8. Iha faze tuir mai sei kontinua finaliza estrada urbana Ainaru vila ho distánsia kuaze km 22.
Samuel Marçal husu ba komunidade, líder komunitáriu no mós joven sira atu koopera ho kompañia sira hodi finaliza obra ne’e tuir tempu ne’ebé determinadu.
Ministru ne’e destaka importánsia estrada ne’e, tanba la’os de’it dalan, “maibé sei hamoris ekonomia, halo sasan sai baratu, fasilita komunidade sira asesu ba sentru saúde, edukasaun, turizmu, no dezenvolvimentu lokál”.
Prezidente Autoridade Munisípiu Ainaru lori komunidade nia naran agradese ba parte hotu ne’ebé halo esforsu husi tinan naruk to’o hetan momentu asinatura kontratu no lansamentu primeira pedra. Nia hateten katak lansamentu ida ne’e akontese iha momentu selebrasaun loron domin ni’an, ne’ebé selebra anualmente iha loron 14 fulan fevereiru.
Notísia relevante: PM Xanana Gusmão lansa reabilitasaun estrada urbana Baukau
Jornalista: Afonso do Rosário
Editora: Isaura Lemos de Deus
