TURISKAI, 14 Fevereiru 2026 (TATOLI) – Xefe Sentru Saúde Turiskai, munisípiu Manufahi, Marino Barreto Soares, solisita ba papulasaun sira atu halo prevensaun ba moras denge, ne’ebé tenke hahú husi idaidak nia família.
“Ami husi janeiru to’o agora iha kazu dengue tolu, maibé ne’e importadu ne’ebé mai husi Dili. Nia sintoma isin-manas no malirin no ita koko nia rezultadu la halo ema lakon vida”, Marino Barreto dehan ba jornalista sira, iha Turiskai.
Kazu ne’ebé Sentru Saúde Turiskai deteta ne’e maioria leve, ne’ebé hahú ona nia sintomas sira no bainhira deteta ona no ekipa halo tratamentu ambulatoriu hodi observa to’o diak.
“Ita halo prevensaun mak halo promosaun kona-ba edukasaun saúde no sira ne’ebé hetan ona kazu pozitivu, ekipa tun bá halo fumigasaun iha área ne’ebé sira hela”, nia relata.
Lembra katak Diretór Servisu Apoiu Diagnóstiku no Terapeutiku iha Ospitál Nasionál Guido Valadare (HNGV), Vidal de Jesus Lopes, antes ne’e informa katak HNGV rejista to’o 09 Fevereiru kazu dengue hamutuk 535, no husi númeru ne’e na’in-hitu mate no 111 kontinua halo tratamentu.
Xefe sentru saúde ne’e informa mós katak moras sira ne’ebé rejista aas iha Sentru Saúde Turiskai mak hanesan Infesaun Respiratória Aguda (ISPA), Diareia no moras sira seluk.
“Moras ne’e mak aas, tanba ita haree udan monu rai no konsumu bee ne’ebé la saudavel no labarik sira halimar hotu la fase-liman, entaun bele prejudika ba kazu sira ne’e”, nia esplika.
Notísia relevante: HNGV rejista kazu dengue 535, hitu mate no 111 hala’o hela tratamentu
Jornalista: Feliciadade Ximenes
Editora: Maria Auxiliadora
