DILI, 16 Fevereiru 2026 (TATOLI)-Parlamentu Nasionál liuhusi reuniaun plenária, segunda ne’e, aprova pedidu asentimentu dezlokasaun Prezidente Repúblika, José Ramos-Horta, bá nasaun tolu.
Tuir pedidu Xefe Estadu nian dezlokasaun ho natureza ofisiál ba Jenebra-Suísa hodi partisipa iha segimentu altu nivel sesaun ba da-61 Konsellu Direitu Umanu ne’ebé hala’o iha sede Nasaun Unida iha Jenebra, entre loron 22 to’o 24 Fevereiru 2026.
Hato’o mós pedidu vizita ofisiál serbisu bá Fransa hodi responde ba konvite Prezidente Repúblika Fransa, Emmanuel Macron, entre loron 24 no 26 Fevereiru.
No vizita ofisiál bá Azerbaijaun hodi partisipa iha Global Baku Forum da-XIII, organiza husi Nizami Ganjavi International Center, ne’ebé realiza iha Baku, Azerbaijaun, hahú iha 12 Marsu. Iha vizita ne’e sei iha mós enkontru ho autoridade Azerbaijaun, inklui enkontru ho Prezidente Repúblika Azerbaijaun, Ilham Aliyev.
Tuir termu efeitu númeru 1 artigu 80 alínea ‘h’ númeru 3, artigu 95 Konstituisaun, ho meiu ne’e Prezidente Repúblika solisita bá Parlamentu nesesáriu konsentimentu préviu.
Biban ne’e, Prezidente Repúblika aproveita informa mós vizita ho natureza privada serbisu ba Portugál hodi partisipa hanesan padriñu iha serimónia atribuisaun doutoramentu Honoris Causa, ba atleta portugeza Rosa Mota iha universidade Portu, entre 17 no 22 Fevereiru.
Informa vizita privada bá Hobart iha Austrália hodi partisipa iha palestra RANZCO-Royal Australian and New Zealand College of Ophthalmologists iha universidade Tazmánia iha loron 07 fulan-Marsu.
Lembra katak Xefe Estadu mós antes ne’e hato’o karta ba Parlamentu Nasionál hodi informa ninia viajen privada bá Davos, Suísa, entre 19 até 25 Janeiru.
Notísia relevante: Prezidente Repúblika informa PN kona-ba vizita privada bá Suísa
Jornalista: Nelson de Sousa
Editora: Maria Auxiliadora
