DILI, 16 Fevereiru 2026 (TATOLI)- Komandu Polísia Nasionál Timor-Leste liuhusi Departamentu Koodenasaun Jestaun Risku, Formasaun Edukasaun Sivika husi Diresaun Nasionál Tránzitu Segurnasa Rodaviaria, sei halo operasaun ba movimentasaun motorizada elétrika.
Xefe Departamentu Koodenasaun Jestaun Risku, Formasaun Edukasaun Sívika husi Diresaun Nasionál Tránzitu Segurnasa Rodaviaria, Superintendente Asistete Polísia Domingos Gama, esplika, dadaun ne’e mosu preukupasaun barak kona ba movimentu motorizada eletriku iha dalan públiku tanba dala barak liu labarik ho idade minoridade mak una, dala ruma tula ema rua ka tolu no la kumpre ba iha Dekretu-Lei Kódigu Estrada, númeru 6/2003.
“Bazea ba preukupasaun ida-ne’e mak foin lalais iha semana rua ka tolu ba kotuk parte Tránzitu Seguransa Rodaviariu ho Diresaun Nasionál Transporte terestre halo enkontru konjunta oinsá mak foti medida ba motor kiik sira,” Domingos Gama hateten ba jornalista sira iha nia kna’ar fatin Kaikoli, Segunda ne’e.
Nia dehan, motorizada scuter ne’e la kategoria hanesan biskileta, maibé konsidera roda rua no roda tolu.
“Entaun sidadaun sira ne’ebé mak atu utiliza motór scuter ne’e tenke ser iha dokumentu no tenke ser mós iha karta kodusaun atu nune’e sira-nia movimentu envolve iha asidente ruma ka envolve violasaun sinál ka kontra ita bele hola medida tuir dekretu-lei kódigu estrada,” nia fundamenta.
Dekretu-lei kódigu estrada iha artigu 120 ko’alia kona-ba sidadaun ne’ebe maka direitu atu hetan karta kondusaun.
“Maibe motor (motorizada) ki’ik sira ne’ebé naka oras nee dadaun ita dehan iha kapitál Dili ita haree no observa labarik sira minoridade sira tinan 10 no tinan 11 sira mak komesa domina motór escuter, ida-ne’e hakarak ka lakohi estadu liuhusi parte Diresaun Tánzitu Seguransa Rodaviaria serbisu hamutuk ho Diresaun Nasionál Transporte terestre hola medida bazea ba artigu 101, tanba motór scuter ne’e nia velosidade nee maizumenus hanesan motor bainbain,” nia hateten.
Nia hatutan, bainhira atu sosa motór scuter ne’e mos tenke ser trata dokumentu no rejista hodi kontrola.
Nia dehan, iha fulan oin husi Diresaun Tránzitu Seguransa Rodaviaria Nasionál hamutuk DNTTsei pasa revista kona ba dokumentu husi motor scuter ne’e.
Nia dehan, obrigatoriamente motorizada scuter ne’e tenke rejistu no bainhira uza mos tenke uza kapasete hanesan mos motór bainbain no obrigatoriamente tenke iha karta kondusaun.
Nia dehan, dadaun nee’ faze avizu, ne’e signifika fulan oin tránzitu no DNTT halo operasaun.
Jornalista : Natalino Costa
Editór: Evaristo Soares Martins
