DILI, 17 Fevereiru 2026 (TATOLI)–Ekipa Maranatha Football Club (FC) susesu manán UNITAL FC ho skor mihis 1-0, enkuantu Akadémika FC derrota 1-9 husi Maudoko iha jogu jornada 13⁰ Liga Futeból Femininu Timor-Leste (LFFTL).
Maranatha ne’ebé iha ambisaun prodús golu hodi eleva pozisaun husi klasifikasaun dalimak susesu rekolla pontu tolu obrigadu tenke hasoru morru defensivu husi jogadora UNITAL FC iha-ne’ebé manán ho skor mihis 1-0 ne’ebé enxe husi jogadora Nova Pertiwi iha minutu 59 iha jogu parte daruak.
Notísia relevante: Maranatha kontinua gaña pontu tolu hafoin halakon Na’in-Feto FC 11-0
Ho vitória referida ne’ebé gaña iha loron Kinta (13/02/2026), rezulta Maranatha mantein iha pozisaun dalimak (5) iha klasifikasaun primeira divizaun ho pontu 21, enkuantu UNITAL FC iha pozisaun dahitu (7) ho totál pontu sia (9).
Entretantu, Akadémika ne’ebé iha ambisaun duni pontu husi Maranatha obrigadu tenke rekoñese derrota bainhira kontra Maudoko FC ho skor 1-9 ne’ebé hala’o iha Kampu Federasaun Futeból Timor-Leste (FFTL), Sesta (13/02/2026).
Maudoko FC lidera golu 0-5 iha parte dahuluk ne’ebé prodús liuhusi jogadora sira hanesan golu tolu (hattrick) husi Marcela Awi iha minutu 6, 15 no 20 no rua seluk enxe husi Deonísia Silva iha minutu 12, 23 no 43.
Iha parte daruak, Maudoko aumenta tan golu haat ne’ebé enxe husi jogadora Luísa Casimiro iha minutu 57, Deonísia Silva 58 no golu ikus husi Marcela Awi iha minutu 90+1, enkuantu Akadémika FC responde golu ida (1) ne’ebé kontribui husi jogadora Gradeana Avelina iha minutu 62.
Husi jogu ekipa rua, rezulta Maudoko mantein iha pozisaun dahaat ho totál pontu 29 no aumenta golu 48, enkuantu Akadémika FC iha pozisaun daneen (6) ho pontu 15, rezultadu manán jogu lima (5) no derrota jogu ualu (8).
Jornalista: Natalino Belo
Editór: Xisto Freitas da Piedade
