DILI, 19 Fevereiru 2026 (TATOLI)—Autoridade Protesaun Sivíl (APC-sigla portugeza) rejista dezastre naturál rezulta vítima na’in-tolu lakon vida durante fulan-Janeiru to’o meadu Fevereiru, tinan-ne’e.
Komandante APC Munisípiu Baukau, Francisco Viana Freitas esplika vítima na’in-tolu referidu lakon vida iha fulan-Janeiru kompostu mane ida no feto na’in-rua iha-ne’ebé kauza husi lafaek tata, mota lori no ai-tohar hanehan.
“Husu ba komunidade atu aparu ai-hun besik uma atu labele boot liu nune’e labele estraga uma no ema,” Francisco Viana Freitas hateten liuhusi telefónema, Kinta ne’e.
Notísia relevante: Ai-tohar rezulta Natácia lakon vida iha Lutumutu
Viana relata, sidadaun na’in-tolu mak hanesan vítima SM sexu mane idade 48 lakon vida kauza husi lafaek tata iha Suku Seisál, Postu Administrativu Baukau vila iha loron 06 Janeiru, NJBF sexu feto idade 23 lakon vida kauza ai-tohar hanehan iha Aldeia Lutumutu, Suku Tirilolo iha loron 17 Janeiru no sidadaun feto inisiál JDX lakon vida kauza mota lori hafoin akontese udan ho intensidade maka’as iha Postu Venilale, 07 Janeiru.
Aleinde ne’e, APC Baukau durante inísiu tinan-ne’e rejista mós uma komunidade hamutuk 39 mak hetan estragu kompostu fulan-Janeiru hamutuk uma 20 no meadu Fevereiru 19 iha-ne’ebé kauza maihusi udan no anin maka’as hamosu rai-halai no ai-tohar.
Viana hatutan APC Baukau seidauk halo verifikasaun ba uma-kain 39 ne’e hodi halo kategoria hanesan aat natoon, kamaan no grave maski distribui ona apoia emerjénsia hanesan ai-han no materiál koziña.
“Atu relata kategoria tenki haree ba nia gravidade. Bainhira halo ona re-verifikasaun mak ita hatene ida-ne’ebé mak natoon, kamaan no todan,” nia esplika.
Entretantu, APC Baukau kontinua relata informasaun ba nasionál no sei submete dadus kona-ba dezastre naturál iha inísiu tinan-2026 nune’e Governu sentrál deside apoia materiál rekuperasaun ba vítima iha Baukau.
Jornalista: Natalino Belo
Editór: Xisto Freitas da Piedade
