DILI, 19 Fevereiru 2026 (TATOLI)—Ekipa Assalam Football Club (FC) kompromete sei marka istória bainhira kontra ekipa forte Karketu Dili FC iha volta daruak meiu finál Taxa Liga Federasaun Futeból Timor-Leste (FFTL) 2025.
Treinadór Assalam FC, Adú Marques Namiruru esplika atu atinje objetivu referidu Assalam FC nafatin halo preparasaun liuliu preparasaun fízika, tátika, hasa’e mentál no fó motivasaun ba jogadór sira tanba konsidera Karketu Dili FC nu’udár ekipa forte iha futeból Timor-Leste.
“Jogu volta daruak ne’e ami sei esforsu maka’as. Atu lakon mós lakon kedas. Mak manán mós ami sei esforsu an atu hasoru Karketu. Tanba ne’e, nu’udár treinadór, ha’u hakarak manán pontu tolu hodi hakat ba finál,” Treinadór Assalam FC hateten iha Estádiu Munisipál Dili, Kinta ne’e.
Notísia relevante: Assalam FC kontra Karketu Dili FC ramata ho skor 1-1
Adú relata, iha volta dahuluk, mezmu prodús uluk golu maibé mosu fallansu iha parte daruak iha-ne’ebé loke oportunidade ba Karketu prodús golu iha minutu ikus (83) nune’e liuhusi treinu orienta ona jogadór atu labele hamosu tan fallansu nune’e bele bá finál.
Nia rekoñese Karketu Dili nakonu ho jogadór nasionál no estranjeiru maibé ho kualidade natoon, tan ne’e Assalam FC sei garante jogu ho atrativu no kompetitivu iha volta daruak ne’ebé sei realiza iha Estádiu Munisipál Dili, Domingu (22/02/2026).
“Ha’u hamutuk ho ekipa iha mehi manán Karketu hodi hakat bá finál tanba nu’udár istória ba ami,” Adú argumenta.
Aleinde ne’e, Kapitaun Ekipa Assalam, Martinho Filipe Lopes Belo hateten nu’udár jogadór preparadu no prontu ona atu kontra Karketu Dili FC iha volta daruak meiu finál liuliu sei hadi’a fallansu ne’ebé akontese ona iha volta dahuluk no garante sei manán iha ronda daruak.
“Ami pursentu 100 preparadu ona hakarak gaña pontu hodi hakat bá finál,” Martinho promete
Entretantu, jogu entre Karketu Dili FC kontra Assalam sei determina ekipa rua hakat bá finál Tasa FFTL hafoin iha jogu volta dahuluk ramata ho rezultadu impata 1-1 ne’ebé hala’o iha Estádiu Munisipál Dili, Domingu (15/02/2026).
Jornalista: Natalino Belo
Editór: Xisto Freitas da Piedade
