DILI, 19 Fevereiru 2026 (TATOLI)–Primeiru-Ministru, Kay Rala Xanana Gusmão, kinta ne’e, hasorumalu ho Prezidente Repúblika José Ramos-Horta hodi kontinua diskute kona-ba problema Giné-Bisau no konkorda hodi kansela misaun Timor-Leste nian atu ba Giné-Bisau hodi rezolve poblema poítika ne’ebé akontese iha rai ne’e.
Notísia Relevante: MNEK manda karta ofisiál ba CPLP, Giné-Bisau nia fatin iha CPLP laiha dúvida
“Ha’u ho Prezidente kontinua ko’alia kona-ba problema Guiné-Bissau nian ne’ebé agora Governu tranzisaun, depois Golpe Estadu, buat sira-ne’e hotu. Ne’ebé ha’u husu deskulpa ona ba sira, tanba ita labele tama iha rai seluk nia asuntu. Entaun, ida-ne’e mak ha’u ho Prezidente konkorda hodi kansela misaun Timor-Leste nian atu ba Guiné-Bissau ne’e,” Xanana hateten ba jornalista sira hafoin remata enkontru semanál ho Xefe Estadu iha palásiu Prezidensiál Nicolau Lobato, Bairru Pite.
Xanana hatutan, Timor-Leste kansela misaun Timor-Leste ba rezolve Gin’e-Bisau nia problema polítika maibé Timor-Leste simu responsabilidade hanesan Prezidensia ba Komunidade Sira Ko’alia Lian Portugés (CPLP-sigla portugés) hodi kontinua serbisu ne’ebé Giné-Bisau halo.
“Loloos ne’e atividade ne’ebé fó hela ba Giné-Bisau halo, mais sira labele ne’e mak, ohin ha’u mai aprezenta ba Prezidente, ita sei hala’o nafatin. Atividade CPLP nian, atividade iha 2026 lubuk ida mak ita sei hala’o,” Xanana dehan.
Tuir nia, Timor-Leste la haruka ekipa atu hala’o misaun iha Giné-Bisau maibé kumpre obrigaaun hanesan Prezidénsia CPLL nian.
“Ita la haruka ita-nia misaun ba ajuda rezolve Giné-Bisau nia problema, maibé, ita sei kumpre ita-nia obrigasaun nu’udar Prezidensia CPLP nian, tanba sei iha atividade lubuk ida-ne’ebé tenke hala’o,” Xanana dehan.
Atividade CPLP ne’ebé sei responsabiliza husi TL iha 2026
Loron 12-13 fulan-Marsu, iha Lisboa Portugál reuniaun pontu fokál ba kooperasaun CPLP nian. Loron 06-07 fulan-Abríl, iha Timor-Leste reuniaun Ministru Turizmu CPLP nian.
Loron 04-05 fulan-Maiu, iha Timor-Leste reuniaun Minsitru Kultura CPLP; iha 06-07 fulan-Maiu iha Timor-Leste reuniaun Ministru Edukasaun CPLP; loron 27-29 fulan-Maiu iha Timor-Leste reuniaun Ministru Defeza CPLP.
Iha loron 01-02 fulan-juñu, reuniaun Ministru Komersiu CPLP iha Timor-Leste; loron 02-03 fulan-Juñu reuniaun Ministru CPLP hala’o iha Lisboa Portugál; iha loron 07-08 fulan-Juñu nafatin iha Lisboa Portugál reuniaun Ministru asuntu Tasi nian.
Iha loron 03 fulan-Jullu iha Kabuverde atividade CPLP nian. Husi loron 13-17 fulan-Jullu tanba CPLP sei halo tinan 30 selebra iha Dili.
Iha loron 28-29 fulan-Outubru, reuniaun Ministru Ensinu Superior CPLP iha Timor-Leste, ikus liu iha fulan-Novembru reuniaun Ministru Juventude Desportu iha Kabu Verde.
Notísia Relevante: Xanana klarifika Timor-Leste la haruka misaun ba Giné-Bisau
Jornalista : Hortencio Sanchez
Editór : Cancio Ximenes
